Siglir tar il cuntegn

Header

cuntegn

US Rueun «Nus n'avain gì nagut al cumenzament»

L'Uniun sportiva Rueun è vegnida fundada il 1948. Il ballape è dentant pir daventà davent il 1960 il punct central da l'uniun.

L'Uniun sportiva Rueun è vegnida fundada il 1948. Durant ils emprims onns giugava il ballape dentant nagina rolla. La funcziun principala era d'organisar ina staffetta ed ina scarsolada ina giada ad onn.

Suenter onns ruassaivels en l'uniun nua ch'igl è marschà pauc han intgins giuvens da Rueun gì l'idea da metter il 1960 il focus sin il ballape. In da quels era Pieder Tschuor (75), ch'era lura gist ord scola.

US Rueun

Giugaders da Rueun e da Trun
Legenda:La US Rueun (cotschen-alv) en in gieu cunter Trun/Rabius il 2019.MAD US RUEUN

L'emprim gieu da campiunadi ha la US Rueun dà il 1964 en 4. liga. Da lez temp la bassa liga en Svizra. Durant ils temps glorius da l'uniun ha l'equipa dentant er dà ballape en 3. ligia. Uss è la US Rueun gia dapi blers onns ina fidaivla equipa en 5. liga.

Intgins giuvens a la testa da l'US Rueun

Intgins giuvens da Rueun han surpiglià il commando da l'uniun sportiva cun la finamira da pudair dar bainprest en il campiunadi da ballape. Quai malgrà ch'els n'avevian nagut, raquinta Pieder Tschuor.

Nus n'avevan nagina plazza, nagin resti da bal ed er nagins chalzers.
Autur: Pieder Tschuorco-fundatur US Rueun

Las stentas e la motivaziun dals commembers han dentant purtà vinavant l'uniun. Il 1964 ha l'US Rueun cumenzà a dar campiunadi. L'emprim gieu è stà a Rabius. Pieder Tschuor sa regorda anc ch'il capitani da Rabius haja dà avant il gieu in matg fluras ad els. Quest gieu hajan els gudagnà cun 2:0.

Ina plazza da ballape n'avevan ils da Rueun betg durant ils emprims onns. Ils gieus da chasa vegnivan, per gronda part, dads a Schluein.

Cun velo tar ils gieus

En ils emprims onns consistiva l'equipa da fitg blers giugaders giuvens che n'avevan betg la patenta dad ir cun auto. Perquai gievan els cun velo tar ils gieus. Saja quai a Trun, Rabius u a Schluein. Igl haja mo dà singulas excepziuns nua ch'in giugader aveva in auto per ir tar ils gieus.

In'atgna plazza da ballape ha l'US Rueun pir survegnì il 1968, ad Isla in zic davent dal vitg. Dapi var 50 onns è questa plazza il da chasa da l'US Rueun.

video
In purtret da l'US Rueun il 1984
Or da RTR Social dals 30.06.2020.
laschar ir

RTR actualitad 11:00

Artitgels legids il pli savens

Scrollar a sanestra Scrollar a dretga