La vischnanca da Val son Pieder cumpra enavos la terma da Val. Per quest intent vul ella crear ina fundaziun, communitgescha la vischnanca. Ils 8 d’avrigl decida la radunanza communala davart questa nova fundaziun. La finamira saja che la fundaziun mantegnia la terma per la vischnanca e la dettia a fit ad in gestiunari. I saja era lez che portia tut ils custs per mantegniment e gestiun.
Peter Zumthor turna puspè tar sia terma
En il cussegl da fundaziun èn tenor communicaziun da la vischnanca duas persunas dal sectur d'architectura e tgira da monuments ed ina persuna che represchenta ils interess da la vischnanca. La suprastanza communala da Val che ha questa cumpetenza, ha elegì l'architect oriund da la terma Peter Zumthor, la mainagestiun da la Protecziun da la patria grischuna Ludmila Seifert, ed il president communal Stefan Schmid.
Contract da cumpra ha previs quest eventual pas
Avant diesch onns aveva l’interprendider Remo Stoffel cumprà la terma. Il contract da cumpra prevesa che la vischnanca ha il dretg da cumprar enavos quella per in pretsch simbolic, transferir ella en ina fundaziun e da stipular in contract d’utilisaziun. Il 2017 aveva la vischnanca da Val Son Pieder da princip decis da far diever da quest dretg.
Cumpra cun discussiuns fin a renfatschas d'illegalitad
La cumpra da la terma aveva però chaschunà viriveris cun renfatschas da corrupziun, enfin che la regenza ha agì: Per pudair sclerir las renfatschas da corrupziun, ha la regenza fatg ina denunzia penala cunter nunenconuschent. E per raschuns da capacitads però era per evitar reproschas da cunflicts d'interess ha in procuratur public extern gì d'examinar il cas. Questas examinaziuns han manà a la decisiun da la procura publica grischuna da metter ad acta il cas – ch'i na dettia nagut da renfatschar tenor dretg penal.