Persunas che van cun skis ordaifer las pistas, fan era quai en la Val Strem che vala sco privlusa dapi ch’ina bova è vegnida giu. Ed ellas ignoreschan uschia las tavlas d’infurmaziun che la vischnanca da Tujetsch ha montà en divers lieus.
La vischnanca da Tujetsch ha suenter la bova en la val Strem laschà far ina expertisa giuridica. Quella formulescha che la vischnanca ha sco emprima obligaziun dad infurmar sur dal privel existent. Quai hajan els fatg cun tavlas d’infurmaziun en differents lieus, di Adrian Deragisch, responsabel per ils privels da la natira da la vischnanca da Tujetsch.
Las tavlas èn montadas en plirs lieus tant giudim sco era sisum la val, nua ch'ils skiunzs da freeride entran en la val. Tant ils lieus sco era il text sin questas tavlas èn definids tras l’expertisa giuridica.
Controllas n’èn betg commensuradas
Controllas tras ina barriera u tras persunas da la vischnanca u era per exempel tras la polizia na sajan betg commensuradas en ina tala situaziun, di Gian Claudio Leeger, il parsura da la cumissiun da privels da la natira da la Surselva. Uschia haja quai surtut num appellar a la responsabladad persunala. Persunas che sa mettian tuttina en privel e traversian la val – sajan sezzas responsablas per lur destin, di l’inschigner forestal.
Tar in accident datti ina evaluaziun
Sch'i dess in accident è lura la colonna d’agid dumandada. E lezza vegnia a giuditgar da cas tar cas co agir tar in accident en la Val Strem. Ma els na mettian nagin en privel per liberar persunas che sajan sapientivamain idas en in privel, ha ditg Andi Müller, il responsabel per il salvament da la colonna d’agid Tujetsch.
RTR actualitad 11:00
