La Bogn Tenigia SA en Val Sumvitg è curt avant la vendita. Ina gruppa da pliras persunas saja interessada da cumprar la societad che posseda ils bajetgs. Quai ha Marc Tomaschett dal cussegl d’administraziun Bogn Tenigia confermà envers RTR.
Tge daventa or da l'hotel da cura anteriur?
Indicaziuns tgi che quellas persunas èn n'ha Marc Tomaschett dentant betg fatg. Era tge plans che questa gruppa ha n'èn anc betg enconuschents. Ils davos onns e decennis hai adina puspè dà interessents da cumpra, dentant è la vendita anc mai daventada concreta. L'hotel è gia dapi 40 onns vid.
Dal resort da luxus ad in lieu bandunà
En ses meglier temp è il Bogn Tenigia stà in resort da luxus per far curas d'aua minerala. Cun l'aua da la Val Sumvitg possian ins curar mals e catars da tuttas sorts, stat scrit en vegls prospects. En ils onns enturn il 1900 ha il directur Stanislaus Caplazi carmalà numerus giasts cunzunt da la Germania en la Val Sumvitg. Cun la segunda Guerra mundiala han ils osps dentant entschet a mancar. Er ils collavuraturs da l'hotel han sentì la guerra.
La guerra ha lura er muntà la fin da l'hotel. Il 1951 ha el serrà sias portas ed è daventà proprietad da la Banca Chantunala Grischuna. Lezza ha anc insaquants onns dà a tschains l'hotel a duas soras Ferroni Ellas han purschì champs da vacanzas per uffants en l'hotel. Dentant il luxus aveva bandunà la val.
Or da l'archiv:
