Erwin Caduff da Morissen ha fatg la via da son Giachen davent da ses vitg enfin a Santiago de Compostello e lura anc vinavant enfin a la riva digl Atlantic a Finisterra. Sias aventuras ha el ussa publitgà en in cudesch cun il titel «Da war noch was».
Durant la vernissascha dal cudesch a Vella ha l'autur ditg gia a l'entschatta ch'il viadi na saja nagut per persunas che sperian che problems quotidians sa schlian durant viagiar.
Jau sun restà il medem ed jau n'hai gì naginas inspiraziuns.
Erwin Caduff ha fatg il pelegrinadi da 2'400 kilometers en treis parts ils onns 2019, 2022 e 2024. La raschun è ch'el lavura anc e n'ha betg pudì prender trais mais vacanzas al toc. Sia motivaziun è stada da far las atgnas experientschas da viadi.
En emprima lingia hai jau fatg il viadi ord marveglias. Co è quai? Jau aveva udì uschè bler, ma jau na craj betg tut quai che jau aud.
Uschia descriva l'autur per exempel hotspots turistics sin il viadi. Da quels ch'ins di ch'ins dovria almain in pèr dis per tils explorar. El haja suenter paucas uras avunda da quels. Plinavant raquinta Erwin Caduff dad enconuschientschas ch'el ha fatg sin il viadi. Ins emprendia ad enconuscher bleras persunas, tranter quels persunas nua ch'ins furma ina relaziun pli stretga. Ed cun auters «discurran ins in quart'ura, e bun èsi», uschia Erwin Caduff.
Durant la vernissascha ha Erwin Caduff era prelegi intginas passaschas ord il nov cudesch. Quel persvada cun in cuntegn profund e cun bels raquints da la aventura.