Siglir tar il cuntegn

Header

cuntegn

Vischnanca da Mustér Sanar ils donns da las malauras

Las lavurs al rempar en Val d’Acletta èn vegnidas realisadas a fin il 2019. Investì ha la vischnanca da Mustér, communabel cun il chantun e la Confederaziun 5,6 milliuns francs. Suenter las malauras dals 3 sin ils 4 d’october 2020 hai dà donns en plirs lieus dal rempar e da las dustanzas da l'ual. Quels ston uss vegnir reparads, declera il suprastant Paul Schmidt.

Auas grondas – ma betg donns vid bajetgs

Ils 3 ed ils 4 d’october hai pluvì uschè fitg sco anc mai dapi che las mesiraziuns han cumenzà il 1959. Quai saja in eveniment extraordinari sco el capitia per regla sulet mintga 50 onns, ha ditg Paul Schmidt. Strusch in onn suenter, ils 13 da fanadur 2021, èsi danovamain vegnì tar auas grondas. Cun in eveniment sumegliant d’aua gronda èsi da quintar en in interval da tranter 5 e 10 onns. Che gist dus gronds eveniments d’aua gronda èn succedids entaifer curt temp, na saja betg stà previsibel, declera Paul Schmidt. Tuttina hajan las lavurs vid il rempar e vi da l’uor existent evità per exempel donns vid ils bajetgs da las pendicularas e dal ressort, quai haja la vischnanca laschà examinar d’ina interpresa externa, declera Paul Schmidt.

audio
Mustér: Sanaziun dal rempar en Val d'Acletta
aus Actualitad vom 31.01.2022.
abspielen. Laufzeit 3 minutas 2 Sekunden.

Pliras lavurs ston vegnir fatgas

Las dustanzas da l’ual en Val d’Acletta èn per gronda part vegnidas realisadas ils onns 1960. Parts da quests mirs han uss donns e ston en in'emprima etappa vegnir reparads. L’onn 2000 hai dà in project da renatiralisar las dustanzas en las parts sut da la Val d’Acletta.

Project actual duai esser a fin l’atun 2023

Las lavurs planisadas actualas custan radund 1,7 milliuns francs. La Confederaziun surpiglia radund 600’000 francs, il chantun paja al project radund in mez milliun francs. La vischnanca ha da sa participar a la sanaziun cun radund 620’000 francs. Sur da questa summa decida il suveran da Mustér ils 13 da favrer. Sch’il project vegn approvà, pon las lavurs cumenzar gia la primavaira. Finidas duajan quellas esser l’atun 2023.

RTR actualitad 12:00

Artitgels legids il pli savens

Scrollar a sanestra Scrollar a dretga