La vischnanca da Tujetsch sa dosta. Ella veglia vinavant ch’i vegn transportà l'enviern autos sur il pass Alpsu. Sco ch'il president communal, Martin Cavegn, ha ditg sin dumonda da la FMR, n'acceptian ins betg la decisiun da la viafier Matterhorn-Gotthard. Il servetsch stoppia esser pussaivel fin ch'i dettia in'autra soluziun.
La viafier aveva annunzià la mesemna, ch'ella na porschia betg pli il transport d'enviern a partir dal 2023. La raschun sajan ils custs memia auts ed il niz memia pitschen. Ultra da quai avessan ins stuì far ils proxims onns investiziuns grondas.
Med cunter la depopulaziun
Tenor Cavegn saja il transport d'autos fitg impurtant per la cuntanschibladad da la regiun. Vinavant hajan ins pudì mantegnair plazzas da lavur grazia a la colliaziun. Quai gidia da franar la depopulaziun. El speria perquai da survegnir sustegn dal chantun e da la Regin Surselva per mantegnair la purschida.
Dapi il 2011 vegnia transportà mintg'enviern var 2'100 autos sur l'Alpsu.
