La populaziun da Mustér decida ils 14 d’avrigl davart il dretg da construcziun per l’ovra solara Magriel. Planisà è ina ovra solara alpina amez il territori da skis da las pendicularas da Mustér. Part a la societad acziunaria fan l’Axpo cun ina participaziun da 60% e las pendicularas da Mustér cun 40%.
La sedia da la societad duai esser a Mustér. Quai porta supplementar dasper la pauschala annuala da 100’000 francs era entradas da taglia, di il president communal René Epp. Era po la vischnanca profitar d’ina cumpart vi dal gudogn da 10%, uschia hajan ins ina pauschala fixada, che vegn pajada gia a partir da quest onn cura che la lubientscha da construcziun ha la vigur legala, argumentescha il president communal.
Ha la vischnanca contractà bain?
La vischnanca da Mustér survegn in tschains da basa annual independent da la producziun da l'autezza da 100'000 francs e quai gia a partir che la lubientscha da bajegiar ha vigur legala, pia gia a partir dal 2024. Era survegn la vischnanca ina cumpart da 10% dal gudogn da fatschenta. Ina pauschala saja ina entrada segira, independenta da la producziun e surtut survegn la vischnanca gia a partir d'immediat quels 100'000 francs, argumentescha il president communal René Epp. Ils adversaris dal project argumenteschan perencunter ch'il chantun recumondia da calcular cun il rap solar e cun la producziun planisada survegniss la vischnanca 130’000 francs e betg 100’000. Quai di Rafael Maissen, commember dal parlament communal e da professiun electrotecnicist HF ch'è cunter il project da votaziun. Cun la sminuaziun da la producziun totala saja era pli pussaivel che l'ovra na possia betg vegnir manada rentabel. La vischnanca argumetescha ch'ella n’haja insumma nagin ristg e sche la societad fetschia gudogn saja quai ina fitg buna entrada fixa per ils proxims 60 onns.
Pli grond, ma pli pauca producziun
In dals puncts che Rafael Maissen crititgescha è che la surfatscha per l’ovra planisada è pli gronda ch'anc l’october cura che la populaziun ha votà cun passa 60% per il project Magriel. Uss vegnian ils panels solars quasi fin en pista e sin pitgas d’ina autezza da sis meters. Quai possia starmentar pussaivels osps da vegnir cun skis a Mustér, pertge las installaziuns sin sugas domineschian il maletg da la cuntrada, di Rafael Maissen.
In auter punct che disturba l'um giuven è che la part da 10% che duai vegnir realisada sin la fin dal 2025 vegnia fatga sin maisas, sco tar auters projects. L’ulteriura part vegn alura sin sugas, in sistem nov, che n'è anc betg cumprovà e testà, ma construì qua per ils proxims 60 onns. Tut stoppia simplamain vegnir fatg svelt e tar talas installaziuns saja quai in dischavantatg, argumentescha Rafael Maissen.
Las pendicularas ch’èn s’exprimidas en ina communicaziun, na vesan quai betg uschia. Els veglian surtut contribuir lur part a la mancanza d’energia durant l’enviern en Svizra e vegnir la finala independent dal martgà d’energia. Era na saja il project betg sa midà grond, el saja anc adina en il medem lieu e la calculaziun pli bassa da la producziun, saja ina calculaziun defensiva per betg svegliar spetgas, mabain per restar realistic, uschia han ditg ils responsabels da l’Axpo e da las pendicularas Mustér.
