Atletas ed atlets dal sport da freestyle fan lur sport principialmain durant la stagiun da l'enviern. Durant il temp pli chaud ston ellas ed els daventar creativs. Lungs viadis en l'ester n'èn insumma betg ina excepziun mabain la regla. Quai vulan uss midar ils dus iniziants dal parc da freestyle a Glion Mitch Buvoli e Lukas Hammer.
Hammer e Buvoli eran a la tschertga d'in lieu adattà ed han svelt realisà ch'en las grondas destinaziuns dal sport d'enviern manca il spazi. Cun schlargiar lur tschertga han els lura chattà il lieu adattà a Glion sin l'areal Grüneck.
Nus enconuschain il sport da freestyle e las sfidas ch'el chaschuna. Il potenzial en la regiun è avant maun.
Il parc na sto betg esser exclusivamain per l'elita da freesyle mabain porscher ina gronda valur per tut la regiun da la Surselva.
In parc da freestyle entir, ina unda artifiziala ed ina paraid da raiver
Il project gia fitg concret cuntegna sper grondas schanzas er potenzial per la cultura ed autras activitads dal temp liber.
Visualisaziun dal «White Pillow Park»
-
Bild 1 von 4. Bildquelle: mess a disposiziun «White Pillow Park».
-
Bild 2 von 4. Bildquelle: mess a disposiziun «White Pillow Park».
-
Bild 3 von 4. Bildquelle: mess a disposiziun«White Pillow Park».
-
Bild 4 von 4. Bildquelle: mess a disposiziun «White Pillow Park».
Tenor ils iniziants duai il parc esser dapli che be in implant da trenament per atletas ed atlets da cader. «En general duain tut ils stgalims da vegliadetgna e da prestaziun pudair trenar tar nus. Ch'il sport da cader ha ina rolla centrala è natiralmain cler», di Lukas Hammer.
En general duain tut ils stgalims da vegliadetgna e da prestaziun pudair trenar tar nus. Ch'il sport da cader ha ina rolla centrala è natiralmain cler.
Plinavant na vegnan betg emblidadas las atletas ed ils atlets da halfpipe, il parc vul porscher il prim implant da trenament-sitg da mesapipa en l'Europa.
Però: i saja dentant gist uschè impurtant d'avair en general las purschidas adattadas per famiglias e per persunas ch'èn entusiasmadas per il sport. Uschia duain vegnir creadas sper l'infrastructura da freestyle er ulteriuras purschidas en il parc. Per exempel duain vegnir integrads paraids da bouldrar e da raiver sco er in'unda artifiziala da surf.
Glion mussa grond interess
Il parlament da Glion ha discutà il project dal «White Pillow Park» ed ha mussà grond interess. Er ch'il project duai esser realisà sin l'areal Grüneck beneventa il parlament. Uschia pon lungas proceduras da midada da zona vegnir impedidas.
La vischnanca vesa potenzial en quel parc. La regiun ed er la vischnanca sezza duai daventar pli prominent en la scena da freestyle professiunala ma er tar fans dal sport e sportistas e sportists da hobi. L'avertura dal parc freestyle è gia planisada la primavaira 2028.
Colliaziun pli damanaivla cun il Tessin vegn realisada
Per Mitch Buvoli, anteriur profi da snowboard, coach e fundatur dal club tessinais «White Pillow Snowboard Club» – è anc in auter aspect da quel project d'impurtanza: la colliaziun dal chantun Grischun cun il chantun Tessin.
L'idea da project è er ch'ils dus chantuns vegnan anc pli manaivel in a l'auter. Tras la colliaziun sur il pass dal Lucmagn ch'è garantida durant tut onn survegnan las sportistas e sportists da freestyle dal Tessin lur basa er durant la stad.
«Dapi passa 10 onns trenescha il «White Pillow Snowboard Club» mintg'enviern var 50 dis a Laax. Che nus avain uss la schanza da planisar in tal project per nus sco er per auters freestylers è grondius», uschia Buvoli. Il club da snowboard «White PillowSnowboard» ha ses domicil d'enviern dapi onns a Luven.