Grad d’autofinanziaziun
Sur il grad d’autofinanziaziun duai la citad ademplir la finamira da spargnar. Quai è la cifra che inditgescha quant che la citad paja ord l’atgna bursa e quants raps ch’ella ha prendì si en furma da credits. Qua intginas cifras per mussar nua che la citad stat:
- En il budget dal 2026 è il grad d’autofinanziaziun tar 21%.
- La finamira è dad avair l’onn 2030 in grad da 80%.
- Sco congual: avant 10 onns aveva Cuira in grad d’autofinanziaziun da passa 180%.
Dapli entradas e pli paucas expensas
Concret vul la citad dar ora passa tschintg milliuns pli pauc e prender en prest 11 milliuns dapli. Ed uschia lura cuntanscher la finamira da spargnar 16 milliuns francs. Entant ha la citad elavurà trais differentas variantas.
Tge che tutga tut en il pachet da spargn, quai duai il parlament metter ensemen enfin la fin dal 2026.
Projects planisads
Per cuntanscher questa finamira sto la citad priorisar u stritgar investiziuns, quai scriva la citad en il messagi. Pervi da quai ha la suprastanza mess la cundiziun da limitar investiziuns tranter il 2028 e 2031 sin 45 milliuns francs. Tuttina èn anc planisadas pliras investiziuns.
Per exempel la sanaziun dal teater da Cuira, la nova pendiculara Brambrüesch e participaziuns a la IBC.