In motiv ch'il Grischun banduna il project per ina collavuraziun pli stretga è, ch’il dumber da cas minimal planisà per ils ospitals na vegn betg en dumonda per il chantun.
Il chantun Glaruna banduna era il project cuminaivel, perquai ch’il provediment d’ospital per la populaziun glarunaisa saja stretgamain collià cun il Grischun. Uschia hai num en la communicaziun. E per il chantun Turgovia na fai betg senn da restar en il project, mo cun quatter chantuns che participeschan.
Preparà project sur trais onns
Ils chantuns Appenzell Dadens, Appenzell Dadora e Son Gagl realiseschan uss en trais la planisaziun d’ospitals cuminaivla. L’emprim succeda la collavuraziun en il sectur da la somatica acuta. Pli tard vulan ils trais chantuns era sa coordinar tar la reabilitaziun e la psichiatria.
Ils trais chantuns che n’èn betg pli da la partida vulan dentant era nizzegiar las conuschientschas ch’èn sa mussadas durant lavurar vi dal project. Els vulan examinar sch’igl è pussaivel da resguardar ils resultats en lur atgnas planisaziuns d’ospitals.
Ospital da Cuira activ en il chantun Son Gagl
Interessant en quest connex è che l'Ospital chantunal dal Grischun maina davent dal 1. da schaner 2023 l'ospital Walenstadt en il chantun Son Gagl. La stad 2022 aveva il cussegl grond dal Son Gagl approvà da vender il manaschi a Walenstadt a l'Ospital chantunal grischun.
Il chantun Son Gagl sustegna il manaschi d'urgenza da 24 uras a Walenstadt cun 1 milliun francs per onn.
