Ils giuvens purs èn sa preparads cun gronda premura per ils Swiss Skills che han lieu dals 17 enfin ils 21 da settember 2025 a Berna. Avant curt ha gì lieu al Plantahof a Landquart in di da trenament per ils trais participants grischuns e lur collegas da Son Gagl e Turgovia.
En ina halla al Plantahof sa radunan tschintg umens en vestgadira da lavur enturn in tractor. Ussa quinta mintga piculezza. Perquai repassa il coach Richard Bickel cun els la savida da basa che po spert ir en emblidanza durant il stress dal campiunadi da professiun. Ed era Jann Viletta, che era avant trais onns en la medema situaziun sco ils giuvens purs, dat vinavant a ses collegas sias experientschas fatgas als Swiss Skills a Berna.
Suenter la part teoretica suondan ils exercizis pratics. Ordadora, sin la plazza da glera davant la stalla veglia dal Plantahof, vegn trenà sco ir cun il char annex, il transport da ballas da silo, la stimaziun da distanzas e da fixar las chargias, durant ch'i plova sco ord sadellas.
-
Bild 1 von 4. Tut sto tegnair! Clau Deplazes fixescha la chargia sin il char annex. Bildquelle: RTR.
-
Bild 2 von 4. Il coach, Fabian Sgier observa co ch'ils purs giuvens fan ils exercizis. Bildquelle: RTR.
-
Bild 3 von 4. Il plova sco ord sadellas entant che vegn transportà ballas da silo e stimà distanzas. Bildquelle: RTR.
-
Bild 4 von 4. In pur sto er enconuscher las differentas culturas da plantas. Bildquelle: RTR.
Entant che ina gruppa vegn bletscha da la plievgia, è l'autra gruppa en stalla, nua ch'igl è bel chaud e surtut sitg. Là vegn exercità la valitaziun d'animals da maz. Ils giuvens purs ston examinar in taur e trais vatgas.
-
Bild 1 von 2. Er quai sto in pur savair ... Bildquelle: RTR.
-
Bild 2 von 2. ... stimar animals da maz. Bildquelle: RTR.
Ils trenaments cuntinueschan l'entir di cun anc dapli inputs ed exercizis, per ch'ils giuvens purs sajan bain preparads, cur ch'i va per propi.
Pertge participar als Swiss Skills?
Ils trais candidats grischuns
-
Bild 1 von 4. Andrin Largiadèr, Clau Deplazes e Dario Battaglia represchentan il Grischun als Swiss Skills a Berna. Bildquelle: RTR.
-
Bild 2 von 4. Tge portan ils Swiss Skills per Andrin Largiadèr? «Ma uschè propi ch'i porta insatge na pudess jau ussa betg dir. Jau schess che quai ha da far in pau cun tschertas ambiziuns e cun in tschert ego ch'ins ha per il mastergn u la passiun ch'ins ha per il mastergn.». Bildquelle: RTR.
-
Bild 3 von 4. Tge ambiziuns da Clau Deplazes per ils Swiss Skills? «D'avair ina buna cumpagnia, d'avair in bun di ensemen ed emprender d’enconuscher buna glieud. Cun ina tala preparaziun sco jau hai fatg enfin ussa, n'è plaz 1 betg l'ambiziun.». Bildquelle: RTR.
-
Bild 4 von 4. Tge spetgas ha Dario Battaglia dals Swiss Skills? «Quai è uss anc grev da dir. Jau fatsch tge che jau pos far. Guardar lura co ch'i va.». Bildquelle: RTR.
Il Plantahof trametta dapi onns adina puspè puras e purs giuvens als campiunadis naziunals da professiun. Thomas Vetter ch'è responsabel per la furmaziun al Plantahof di ch'el chattia impurtant che las absolventas ed ils absolvents dal Plantahof hajan la pussaivladad da sa mesirar cun autras scolas d'agricultura. Els tramettian adina bunas fin fitg bunas candidatas e candidats ed hajan gia gì success, cun avair l'in u l'auter en il final - e cun Johannes Meyer il 2018 schizunt in campiun svizzer.
Ma nua èn las candidatas?
Da las 36 persunas da l'agricultura da l'entira Svizra che sa mesiran dals 17 fin 21 da settember 2025 a Berna èn mo sis dunnas. Er en il Grischun èn tut ils trais candidats umens. Thomas Vetter manegia tar quai: «Quai è ussa quest onn. La penultima giada avevan nus er ina dunna ch'ha cumbattì e ch'è stada fitg capabla. Ella fiss bunamain vegnida en il final.»