Avant egl ha la vischnanca da Tavau in center da traffic, pia ina «Verkehrsdrehscheibe», che duai meglierar la situaziun da traffic – surtut l’enviern, cura che las skiunzas ed ils skiunz arrivan cun il tren, l'auto e cun il bus. Part da quest project fan las suandantas midadas:
- la staziun da tren Tavau Vitg duai vegnir spustada per 200 meters sin l’autezza da la pendiculara Parsenn
- là duai dar in nov terminal da bus ed ina garascha da parcar
- ed in nov traject da traffic cun dus rundellas
Tenor la vischnanca da Tavau saja uss il dretg mument cunquai ch’ella è en ina buna situaziun finanziala. En pli stoppia la Viafier retica sanar la staziun da tren pervi da la lescha davart l’egualitad da persunas cun impediment. La viafier sezza spustass gugent la staziun, ha ella ditg envers il schurnal regiunal dad SRF. Sche la populaziun schess dentant Na, lura vegniss simplamain renovada la staziun existenta.
Dals custs nà saja quai in gieu da summa null. Perquai ch’els pon tenor la Confederaziun duvrar ils custs per la staziun veglia u era per la nova. La Viafier fa quint cun 25 milliuns francs.
Credit per far in project
En questa votaziun dals 30 november 2025 vai per la dumonda, sche la vischnanca duai persequitar vinavant quest project da traffic ed elavurar in plan per 2,1 milliuns francs. Tar in Gea elavurass ella in plan cun detagls. Tar in Na restass la situaziun da traffic actuala e la vischnanca vegn a faschess auters plans per obtegnair staziuns ch'èn accessiblas per tuts. Enfin uss haja la vischnanca gia fatg plans ch'han custà 2,7 milliuns francs. Quai vegn per part era crititgà – en il parlament èn parts da la PPS e da la PLD s'exprimidas cunter il credit che duai vegnir vitiers. Per la PPS saja il project memia grond e betg survisibel. Els giavischiassan che quest project vegn realisà en etappas.
Suenter in Gea pudess il project vegnir planisà. La vischnanca fa quint che questa nova staziun, il nov terminal da bus ed il nov traject da via custassan 108 milliuns francs, da quests suprendia la vischnanca 66 milliuns. Da quai vegn dentant pir discurrì en in segund pass e suenter in’ulteriura votaziun.