La polizia grischuna ha scuvert a Tavau fatschentas cun drogas cun pliras persunas involvidas. Sco quai che la polizia chantunala dal Grischun scriva, hajan els chattà drogas d'ina valur da radund 200'000 francs. Per scuvrir il cas haja duvrà gronda lavur da retschertga.
Chattà plirs kilos cocain e hasch
Dapi il schaner ha la polizia chantunala arrestà 11 persunas. Ad ellas vegn reproschà da tranter auter avair vendì u regalà cocain, amfetamins e products da cannabis. Cunter tschintg umens era vegnì ordinà arrest d'inquisiziun. Trais dad els èn anc adina en praschun.
La polizia ha chattà las drogas illegalas enten intercurir chasas. Sulettamain en ina chasa hajan las policistas ed ils policists chattà passa in kilo cocain, plirs tschient grams amfetamins e plirs kilos hasch. Ultra da quai ha la polizia confiscà radund 20'000 francs uschenumnads «daners da drogas».
