Il december era Philipp Wilhelm scrit malsaun pervia d'ina depressiun da spussada («Erschöpfungsdepression»). Plirs mais n'ha el betg pudì lavurar. Dapi la stad è el puspè a temp cumplain a la testa da Tavau. D'esser puspè 100% en uffizi sco landamma, fetschia grond plaschair. Ma el remartga er ch'el veglia sa concentrar sin l'uffizi e natiralmain er sin sia sanadad e sia famiglia. E perquai dettia el giu l'uffizi da deputà en il Cussegl grond la fin d'october.
La malsogna saja stada il punct da partenza per ponderar sin tge ch'el vul sa focusar en il futur. Ma la decisiun na saja betg stada simpla per l'um engaschà. El haja politisà fitg gugent en il Cussegl grond. Ma el craja che sch'ins saja stà en in tal punct (da sanadad), fetschia quai senn da sa dumandar co ins focusescha las atgnas forzas, las atgnas resursas. E quai haja lura manà a la decisiun correspundenta.
In sguard enavos sin set onns en il Cussegl grond
Dapi il 2018 ha Philipp Wilhelm represchentà il circul electoral da Tavau en il Cussegl grond. Tge resta al landamma da quest temp? Il pli fitg haja el plaschair, ch'el haja pudì contribuir a l'in u l'auter progress en il chantun, per exempel il nov dretg d'elecziun en il proporz. Ma er da l'impuls per il Green Deal, che metta ad moviment en il chantun bleras investiziuns en tecnologias, edifizis ed autras chaussas favuraivlas al clima. E sper quai natiralmain er il barat cun las collegas ed ils collegas da l'entir chantun.
Fin che la nova legislatura dal Cussegl grond cumenza l'avust 2026 succeda Rita Gianelli a Philipp Wilhelm.