Wilhelm Tell ha gia pliras giadas dumagnà sin las tribunas da teater. Tut quai en differentas furmas ed inscenaziuns. La persuna ch'inscenescha uss il Tell, che sa basa sin il roman da Joachim B. Schmidt dal 2022, è in Sursilvan – numnadamain René Schnoz.
Impurtant da savair è ch'i n'è betg in tipic teater da 0815 cun persunas sin tribuna. Na, igl è in gieu da mascras, gieus da sumbrivas e cun vuschs d'in gieu auditiv. Per il reschissur dal toc èsi davent dal cumenzament stà cler, ch'el na veglia betg inscenar a moda classica quest teater da Tell. El na pudessi betg s'imaginar quest toc cun normals giugaders da teater. La finamira saja stà d'inscenar a moda abstracta quest teater.
Jau lev chattar ina pussaivladad abstracta da mussar las scenas per che l'istorgia restia in mitus.
Part dal teater da Wilhlem Tell fa cun Angela Collenberg, er ina Lumneziana. Ella gioga gist pliras rollas en quest toc che cuzza bun duas uras. Davent da sumbrivas davos la culissa fin tar persunas cun mascras sin tribuna. Tut quai dentant senza tschantschar sez, cunquai ch'il text vegn emess sco gieu auditiv. Ina pulita sfida, conceda Angela Collenberg. Persuenter saja fitg interessant da giugar cun il corp.
Il nov teater da Wilhelm Tell en il teater Cuira. In act plain maletgs spectaculars, sumbrivas e mascras. E cun in text ch'è vegnì registrà sco gieu auditiv.
