Siglir tar il cuntegn

Header

audio
Trair chandailas – la finamira dal project
Or da Actualitad dals 05.12.2023. Maletg: RTR
laschar ir. Durada: 3 minutas 1 Secunda.
cuntegn

Temp d'advent a Cuira Dapli che mo trair chandailas

Dapi 14 onns pon ins ir en la chasa da giuvenils «Stadtgarten» durant il temp d'advent a trair chandailas. En il center na stattan betg las collavuraturas ed ils collavuraturs da l'instituziun, mabain 45 giuvenils.

Mintg'onn avra la chasa da giuvenils sias portas ed envida da trair chandailas. Il lavuratori daventa in lieu d'inscunter per grond e pitschen. Là vegn zambregià, discutà e giudì il temp d'advent. Ils giuvenils tranter 13 e 17 onns giogan ina rolla fitg impurtanta. Els èn numnadamain ils experts en trair chandailas, e surpiglian ina gronda responsabladad. Els retschaivan ils giasts e mussan co ch'il trair chandailas funcziuna. Mintgin dad els surpiglia in pensum e contribuescha uschia sia part al project.

Jau sun oz responsabla per il kiosc e serv ils giasts.
Autur: Fabienne ina giuvenila
Jau pais las chandailas a la fin, e lavur vi da la cassa.
Autur: Arun in giuvenil
Jau muss als creschids ed als uffants co ch'els pon far lur chandaila, e guard che la tschaira è adina emplenida.
Autur: Schanaya ina giuvenila

Tut questas incumbensas adempleschan ils giuvenils durant l’occurrenza. I dat era dis pli stentus, nua ch’il local è fullanà cun visitas. Ma malgrà tut quai lavuran els gugent.

Ils giuvenils pon rimnar bleras experientschas e savida pratica che vegnan a bun ad els pli tard. Sper quai survegn mintgin dad els in pitschen daner da giaglioffa. En il center dal project na stat dentant betg mo la paja, mabain anc bler dapli. Sco quai ch'il manader Nicolas Marx di, veglian els integrar las scolaras ed ils scolars en la societad, preparar els sin il mintgadi professiunal ed evitar ch'i vegnia prendì decisiuns falladas.

Cun la purschida da trair chandailas vulain nus cuntanscher, ch’ils giuvenils possian far emprimas experientschas en il mund da lavur. Uschia pon ins facilitar ad els l’entrada en l'emprendissadi.
Autur: Nicolas Marx manader lavur da giuvenils Cuira
Nicolas Marx auf dem Bild vor ein paar Kerzen.
Legenda: Manader Nicolas Marx RTR

L’entrada en il mund dals creschids n'è betg uschè simpla per tuts, ma quest passadi po vegnir levgià cun il dretg sustegn. En quest cas cun il project da trair chandailas. Tenor il manader Nicolas Marx vegn ina part da las entradas investida en ulteriurs projects per giuvenils.

RTR actualitad 08:00

Artitgels legids il pli savens