La firma Altatek Scrl da Tenna lavura ensemen cun la scola auta spezialisada dal Grischun vid in project per l'agricultura da muntogna: Ina maschina da segar cun in ischigl multifuncziunal cun tracziun electrica, numnà curtamain Amea.
I duai dar in segader autonom, per las spundas taissas, declera il mainagestiun e confundatur da l'Altatec, Thomas Buchli.
Nus vulain ch'il segader en la regiun da muntogna possia lavurar uschè autonomamain sco pussaivel.
Il prototip che vegn testà dapi l'onn 2021 duai distgargiar puras e purs cura ch'els lavuran corporalmain fitg stentus vid spundas taissas ed il medem temp reducir las emissiuns per l'ambient. La spezialitad da la maschina da segar è ch’ella po spustar ses pais, uschia ch’i daventa pussaivel da lavurar a moda segira er en territori spundiv.
«Quai ans differenziescha da maschinas per la planira», accentuescha Buchli. Tras ina procedura d'emprender speziala po il roboter plinavant enconuscher obstachels ed evitar quels a moda independenta.
Chantun sustegna project
Il chantun Grischun sustegna quest project cun ina contribuziun da 362'400 francs. «Igl è in enorm plaschair ch'il chantun crai vid il project», sa legra Buchli da la promoziun che vegn dada en il rom dal program GRdigital. Era Thomas Roffler, president da l'Uniun purila grischuna, è impressiunà da la maschina innovativa: «L'agricultura grischuna è adina orientada ad innovaziuns. Jau sun segir ch'i dat purs en il chantun che vegnan a cumprar quai». Cunzunt la segirezza en il territori spundiv e la pussaivladad d'evitar accidents vesan el sco gronds avantatgs.
Diversas sfidas spetgan
Malgrà il cumenzament empermettent datti anc sfidas. «La pli gronda sfida è en il mument l'ulteriura finanziaziun», declera Buchli. Er obstachels giuridics per il manaschi autonom ston anc vegnir sclerids. Il startup quinta cun in pretsch tranter 50'000 e 100'000 francs per maschina. Fin ch'il martgà è madir vegni dentant anc a durar in pèr onns.
Buchli resta optimistic: «Forsa stain nus en tschintg, sis onns puspè qua e pudain dir: I dat in'interpresa che po far quai». Cun l'Amea na pudess betg mo l'agricultura da muntogna dal Grischun profitar. Il startup vesa er potenzial per l'utilisaziun per lung da binaris da viafier u en parcs solars. L'innovaziun dal Grischun pudess vegnir applitgada lunsch sur ils cunfins dal chantun ora.
Collavuraziun cun la FHGR
Ina rolla centrala en il svilup da la maschina da segar digitalisada, ha la Scol'auta spezialisada dal Grischun FHGR. Ella surpiglia la direcziun operativa dal project, e sviluppescha vinavant il model da fatschenta che cumpiglia la commerzialisaziun da la maschina da segar. «La finamira è quella ch'ins venda la maschina l'emprim mo en il chantun Grischun, e suenter en in segund pass fiss la finamira da vender ella era en autras regiuns alpinas e quai era en l’ester», ha ditg Tanja Ospelt, ch’è collavuratura scientifica tar la FHGR.