Tests prenatals vegnan fatgs en ils emprims trais mais da la gravidanza cun in ultrasun e cun tests da sang. Els mussan sch'i dat la probabilitad che l’uffant pudess avair in impediment sco per exempel trisomia 21. Ils ospitals e las clinicas na fan betg statisticas dals tests prenatals ed ils resultats, uschia ch'i n'è betg pussaivel da demussar la situaziun en il Grischun ed en la Svizra.
Diagnosa
Sch'il test prenatal mussa colliaziuns spezialas da cromosoms, lura datti ina probabilitad. Dentant ston vegnir fatgs ulteriurs tests, per confermar la diagnosa. La schefmedia da l'agid da naschientscha en l’ospital chantunal Grischun, Carolin Blume, emprova da relativar las cifras.
Vus essas 500 giadas en speranza ed ina giada datti il ristg che voss uffant ha in impediment.
Tenor la medischina vala ina probabilitad da 1:500 fin 1:1000 sco bassa, 1:350 sco media e 1:10 fin 1:50 sco probabilitad auta. Tar ina diagnosa èsi tenor Carolin Blume, che lavura dapi 26 onns sin la professiun, impurtant da sustegnair, infurmar e communitgar cun ils geniturs.
Cifras da differents ospitals
En ils blers cas d’ina probabilitad che l’uffants ha in impediment sa decidan il pertutgads e las pertutgadas per in abort, en l’ospital chantunal a Cuira èn quai 90% fin 95%. Da las circa 1’200 naschientschas èn l’onn passà vegnids sin il mund dus uffants cun impediment. A Scuol sajan ils ultims onns mo naschids uffants senza impediment. Dus giadas han ils tests prenatals mussà defurmaziuns dal corp e tuttas dus giadas èn ils geniturs sa decidids per in abort. A Glion èn ils ultims onns naschids circa 160 uffants, da quests sajan tuts vegnids sauns sin il mund. Questas cifras èn exempels dals singuls ospitals e na pon betg vegnir generalisadas.
