Siglir tar il cuntegn

Header

audio
Mancanza da spazi d'abitar: tge fa la regenza?
Or da Actualitad dals 19.12.2023. Maletg: Pixabay
laschar ir. Durada: 3 minutas 1 Secunda.
cuntegn

Tge fa la regenza? Pauc spazi d'abitar per indigens

Il spazi d'abitar en il Grischun è stgars e char. Chattar in'abitaziun e vitiers in'abitaziun pajabla n'è ozendi betg pli uschè simpel. Ed er las segundas abitaziuns han ina gronda influenza sin quest svilup. I dat adina pli paucas abitaziuns primaras e blers indigens èn sfurzads da bandunar lur vitgs e da tschertgar in nov domicil. Plaunet entschaivan las singulas vischnancas a reagir. Co giuditgescha il chantun la situaziun actuala?

Il spazi da viver è in tema omnipreschent che procura adina puspè per grondas discussiuns e per critica. In aspect che giauda stedi l'attenziun èn las abitaziuns secundaras. Abitaziuns che na vegnan betg dabun als indigens. Per bleras vischnancas è la mancanza d'abitaziuns primaras in grond problem. Tenor Marcus Caduff, il schef dal departament da l'economia publica, n'ha questa mancanza betg mo da far cun las abitaziuns e chasas secundaras. I dettia era vischnancas cun paucas abitaziuns secundaras nua ch'il spazi d'abitar manchia tuttina.

Mintga vischnanca va enturn auter cun il problem e tenor Marcus Caduff na dessi era nagina soluziun che correspundess a tuts. Tenor il chantun stoppian ins stgaffir dapli spazi d'abitar cun bajegiar quel. Ils davos onns hajan ins era survegnì dapli lubientschas da bajegiar en il chantun.

Ed en il futur?

En l'avegnir vegn il focus mess sin la construcziun da novs spazis d'abitar e quai pertutga cunzunt abitaziuns primaras per persunas e famiglias indigenas. Sco quai che Marcus Caduff fa attent saja la responsabladad per il foss da problems en ils mauns da la Confederaziun, dal chantun e da la vischnanca. Tuts stoppian surpigliar lur pensums.

Artitgels legids il pli savens