Trais turists chaminan tras la natira e vulan campar sur notg en il guaud. Els na respectan dentant betg la bellezza da la natira e bittan enturn lur merda. Sin quai vegnan ils spierts da la natira e sa defendan. Uschia entschaiva il toc da teater che la gruppa da 14 acturas ed acturs ha mess ensemen.
Cun improvisar s’han sviluppadas in pèr scenas nua che nus avain stuì rir terriblamain.
Sco emprim han els improvisà in zic ed or da quellas scenas han els lura elavurà ina istorgia cun in fil cotschen. Cun furmar las rollas hajan els guardà sin las fermezzas da las differentas persunas. Ils ins sajan fitg ferms en la lavur cun texts, auters han dapli plaschair d'exprimer emoziuns cun lur moviments da lur corp e cun lur mimica. In impurtant punct saja ch’els possian adina improvisar. Tras quai è dentant er mintga represchentaziun in zic autra.
Sch'i vegn bun vegnia bun e sch'i na vegn betg bun vegnia almain legher.
Bler applaus a la premiera dal toc
E bun èsi vegni la gievgia saira cura che la premiera ha gì lieu en la Postremise a Cuera. Intginas acturas eran fitg, auters pli pac gnervusa. La finala hajan els exercità bunamain in onn, di Corsin Manetsch che gioga il spert da l'element aua. Ed era la manadra da producziun Anigna Jörg Gnanavi di che tuts sajan uss leds da pudair mussar lur prestaziun. I saja era impurtant ch'il public vesai ch'i saja pussibel da far in teater professiunal cun persunas cun impediment.
Els emprendan era bler per la vita: Star nà, discurrer cun la glieud ed improvisar.
E suenter la producziun è avant la producziun. Las acturas ed ils acturs dastgan numnadamain anc star trais giadas cun lur toc sin tribuna.
