Ordadora, avant la localitad dal Giuven teater Grischun è ina gruppa da tschintg uffants plain energia. Els èn vi da trenar ina scena per in film curt – in film ch'els creeschan sezs da A fin Z. Davos quai stat «Filmkids», ina scola da film per uffants e giuvenils tranter 10 e 18 onns. Ensemen cun il giuven teater Grischun ha lieu a Cuira in project per crear in film curt.
Gruppa 1: L'istorgia da mobing
L'emprima gruppa trenescha e discutta co realisar l'istorgia ch'els han scrit. I va per mobing en scola. La «Gäng» fa beffas sur d'in conscolar. Ina buoba emprova da defender il buob ed en l'istorgia sa mida lura inquala chaussa. Cunquai ch'il buob che vegn sut las rodas è bun en scola e la «Gäng» betg, dovran els tuttenina ses agid. La fin datti dentant betg in happy end: Quai saja pli realistic.
Las persunas davos «Filmkids»
«Filmkids» è vegnì fundà l'onn 2006 da la producenta da film e managera da cultura Simone Häberling. L’idea latiers è naschida l’onn 2004 tar il casting per il film da success svizzer «Mein Name ist Eugen». Häberling è stada responsabla per il casting dals quatter mats.
Tar nus vegnan per part uffants che vegnan sut las rodas. Quests uffants scrivan per il solit las meglras istorgias.
«Filmkids» porschan curs, lavuratoris, champs ed emnas da project da scola en tut ils secturs da l’aspectatur da film e da la cinematografia. Ils passa 70 coachs e coachas èn tuttas cineastas professiunalas, tranter quels Oscar-nominads e purtadras da premis da film svizzers.
Gruppa 2: La tragedia en famiglia
La segunda gruppa è vi da trenar en chasa. Là han ils uffants creà lur pitschen mund. En lur scena datti grondas discussiuns. Tenor lur istorgia na vegnan els numnadamain betg a frida in cun l'auter. I sa tracta da quatter fragliuns ch'han permanentamain dispitas. Tuttenina schabegia ina tragedia en famiglia. Ils geniturs ch'èn gia ids en vacanzas moran atras in accident sin ina bartga. Ils uffants fan pasch e tegnan ensemen.
