In zic zuppà en ina giassa en la citad veglia da Cuira, cun autas fanestras e palmas davant l'entrada, sa chatta ina bar – la «Werkstatt».
-
Bild 1 von 2. L'entrada da la bar «Werkstatt». Bildquelle: RTR.
-
Bild 2 von 2. Tras ina porta da mesch arrivan ins en la bar. Bildquelle: RTR.
Dapi l'onn 2016 han il manager cultural Romano Zoppi ed ils dus barkeepers Jann Maissen e Jonathan Blättler manà la bar – ma la fin da l'onn, a chaschun da lur 10avel giubileum, surdattan els la «Werkstatt» ad in nov team. «Cura che nus avain cumenzà, n'avain nus mai pensà che nus restian qua uschè ditg», di Jonathan Blättler. A l'entschatta vulevan els surpigliar la «Werkstatt» per dus fin trais onns – ord quai èn lura vegnids 10 onns.
Cun il giubileum da 10 onns avain nus chattà in bel mument per chalar.
Lavurar independentamain e la lavur en la gastronomia en general saja bain bella ed enritginta, dentant era fitg stentusa. Perquai sajan els trais sa decidids da dar giu la bar la fin da l'onn.
-
Bild 1 von 2. Jonathan Blättler ha surpiglià la «Werkstatt» il 2016 ensemen cun Romano Zoppi e Jann Maissen. Bildquelle: RTR.
-
Bild 2 von 2. La fin dal 2025 dattan els giu la bar. Bildquelle: RTR.
Il pli gugent avessan els dà vinavant la bar intern, raquinta Jonathan Blättler. «Per nus èsi stà cler ch'i fiss bel, sche la «Werkstatt» pudess cuntinuar en in senn sumegliant sco quai che nus avain fatg quai – la bar duess restar in local public da cultura e gastronomia.»
Quai ha era funcziunà – in team da tschintg persunas, che sa cumpona da collavuraturs e collavuraturas actualas ed anteriuras, ha decidì da surpiglier la bar en la citad veglia da Cuira.
Per nus èsi stà impurtant che la «Werkstatt» resta in local public.
Ina da las tschintg persunas che vegnan a surpigliar la bar è Anouk Rudin. Ella lavura dapi trais onns davos la bar en la «Werkstatt». Tenor ella na saja la decisiun da surpigliar dapli responsabladad betg stada difficila. Las tschintg persunas sajan vegnidas ensemmen spert ed hajan furmà in team, raquinta ella.
Cura che nus avain udì ch'ils schefs actuals chalian, era l'emprim patratg tar nus tuts: quai fiss uschè donn, sche la «Werkstatt» giess davent da Cuira.
Il team che surpiglia la «Werkstatt» consista dad ella, Daniel Iselin, Freddy Jones, Bianca Sutter ed Abudi Gasem. «Nus avain pensà: pertge betg?», di Anouk Rudin. «Surpigliain la bar, portain nossas atgnas ideas e guardain tge che capita.»
-
Bild 1 von 2. Anouk Rudin è ina da las tschintg persunas che surpiglian la «Werkstatt». Bildquelle: RTR.
-
Bild 2 von 2. Il nov team ha gia bleras ideas co els vulessan crear la «Werkstatt» – dentant anc nagut concret ch’els tradissan. Bildquelle: RTR.
Fin ch'igl è dentant uschè lunsch ed il nov team surpiglia la bar, han els anc in onn temp da sa preparar. Quai è stà ses giavisch, di Anouk Rudin. «L'idea era che nus ans engaschain successivamain en las lavurs d'in schef.» Ella saja engraziaivla, ch'els hajan durant quest temp adina il sustegn dals trais antecessurs. Durant quest temp da preparaziun pon els tuttina gia far atgnas ideas ed inputs – da quests hajan els avunda, di la giuvna dunna.
Malgrà tut il plaschair e tut l'energia fa ella era blers quitads. «Nus giain en in champ da lavur che nus n'enconuschain insumma betg», di ella.
Ina buna purziun respect vegn cun – quai è tenor mai era necessari – ma betg tema. Dapli plaschair.
Tuttina n'ha ella nagina tema. «Jau sun persvadida che nus faschain quai en tschintg». Ed ussa hai num: preparar, preparar, preparar. Per ils giasts na sa mida nagut durant quel temp – en l'avegnir vegni vinavant a dar inscunters, bavrondas e concerts en la «Werkstatt».
Or da l'archiv: l'avertura da la «Werkstatt»