Il temp da Nadal è per la scheffa dal bistro «da mamma» il pli intensiv. Quants panettones che Antonietta Buoncore fa mintg'onn na sa ella betg. Ella è simplamain cuntenta sche tut las empustaziuns èn prontas.
Ils uffants spetgan sin Nadal per survgnir regals. Jau spetg sin Nadal per finir ils panettones.
Emprendì da far panettones ha Antonietta Buoncore d'in pasterner dal Tessin. El è vegnì a Cuira per mussar tut ed era crear anc in panettone tuttafatg spezial. In panettone grischun cun il gust da «Röteli». Quel han els fatg per onurar il Grischun.
Jau hai fitg gugent il Grischun ed il Grischun ha gugent mai. Perquai avain inventà il panettone da «Röteli».
Per far in bun panettone dovr'ins pazienza. 72 uras dura l'entir process. Suenter ch'il panettone è stà en il furn, ha el anc da pender per 12 uras cun il chau avant per che l'umiditad sa scumpartia regularmain.
Cun quai ch'ils panettones n'han naginas substanzas da conservar han ins da consumar ils panettones entaifer var in mais. Quai è la gronda differenza dals panettones d'industria. Quels vegnan per part gia fatgs l'avrigl per la vendita dal december.