Il sistem da traffic sin l'autostrada A13 e la via da Partenz A28 è sa cumprovà. A questa conclusiun vegn il chantun suenter in inscunter cun ils responsabels per il traffic da Confederaziun, regiuns e vischnancas. Durant fins d'emna d'enviern hai dà mesiras per dosar il traffic ed impedir ch'autos guntgeschian tras ils vitgs. Perquai veglian ins sur ils firads da primavaira cuntinuar cun l'uschenumnà sistem da dosar sin l'A28 en il Partenz e sin l'A13 tranter Zezras ed il tunnel d'Isla Bella.
Ils dis da Pasca crodan er anc en la stagiun d'enviern. Perquai vegnin nus a cuntinuar cun las mesiras sin la via da Partenz.
La finamira dal sistem è d’impedir colonnas en ils vitgs ch’èn per lung da l'autostrada e la via tras il Partenz. Quai per che las organisaziuns d'urgenza sco l'ambulanza e la polizia pon passar ed er per ch'abitantas ed abitants han pli pauc disturbis da traffic da guntgida.
Grazia a quest sistem vegnan tut las automobilistas ed ils automobilits tractads a moda eguala.
Il chantun cussegliescha d'evitar da viagiar durant dis u temps da bler traffic u er da guntgir sin ils binaris. Las Viafiers federalas svizras porschan numnadamain durant Pasca 49'000 plazzas supplementaras sin trajects tranter la Svizra tudestga ed il Tessin. I saja dentant grev da realisar campagnas d'infurmaziun effectivas, di Andreas Pöhl da l'Uffizi da construcziun bassa. Il clientel vegnia da blers differents lieus, uschia che las mesiras sajan inevitablas.
Duvrar vial da panna e charrar pli plaun
A vista mesauna planisescha l'Uffizi federal da vias da duvrar il vial da panna tranter Landquart e Sargans sco terz vial per il traffic. Quai duai cunzunt schluccar il traffic da return vers nord durant las fins d'emna d'enviern. Plinavant è planisà da sbassar il tempo maximal tranter Tusaun e Sargans en omaduas direcziuns. Quai gidia d'armonisar il traffic e da nizzegiar meglier las capacitads da l'A13, scriva il chantun. Midar vials e franar impedeschia il traffic e chaschunia colonnas.
Or da l'archiv
Er gia l'onn passà durant ils dis da Pasca ha l'Uffizi da construcziun bassa purziunà il traffic.
