Al San Bernardino ha in accident accentuà las stretgas sin las vias vers il sid il glindesdi. Il tunnel dal San Bernardino ha stuì vegnir serrà per pliras uras. La consequenza: il traffic è vegnì svià sur il pass – ed il traffic grev ha stuì spetgar als pausadis a Campagnola e Valragn, ubain pigliar in'autra ruta. Il baud suentermezdi è il tunnel lura puspè vegnì avert.
Bler traffic schont – però gist tant è stà nunspetgà
Ch'i vegnia a dar ina fin d'emna intensiva ha Andreas Pöhl prevesì. El è responsabel per il management da traffic tar l'Uffizi da construcziun bassa dal Grischun. Cun tant traffic n'ha dentant er el betg fatg quint. La raschun saja surtut che tut las parts da la Germania – cun excepziun da Bayern e Baden-Württemberg – han gì vacanzas. Ed era en tut ils chantuns da la Svizra èn vacanzas da stad. Ina fin d'emna cun extraordinari bler traffic datti mintg'onn, ina cun tant traffic però darar.
Nus pensain ch'il cumportament actual da viagiar è sa midà pervia dals pretschs da sgular, e pervia da las destinaziuns, nua ch'ins po sgular main bain. I dat ussa simplamain ina tendenza da puspè viagiar cun auto e rulotta.
Las colonnas da la fin d'emna passada na duessan dentant betg sa repeter las proximas emnas, di Pöhl. Tenor el van adina daplirs puspè en vacanzas cun l'auto, perquai che sgular è pli char, e perquai che pliras destinaziuns èn memia datiers da regiuns da conflict.
Per proxima sonda pudessi tenor il chantun anc dar in zic dapli moviment vers il sid. A partir da l'avust alura plitost traffic vers il nord, cura che las vacanzas van vers la fin. A lunga vista discurra Andras Pöhl d'in augment da traffic da 1% fin 2%.
Bler traffic emplaina l'autostrada – però er ils vitgs
Il traffic enorm aveva gia cumenzà a crescher il venderdi passà. En il decurs da la fin d'emna hai adina puspè dà colonnas da per part plirs kilometers al San Bernardino, ed insumma sin l'autostrada A13 hai adina puspè stagnà als puncts neuralgics tranter Cuira e Rothenbrunnen.
E malgrà tut ils appels da restar sin l'autostrada, han blers empruvà da guntgir las colonnas sur las vias principalas sur ils vitgs sper l'autostrada. Però era là hai dà colonnas e disturbis – malgrà il sistem da dosar che l'Uffizi da construcziun bassa grischun ha mess en funcziun. La sonda ha il chantun era activà persunas ch'eran sin pichet ed era la Blue Line a Domat – la ruta da sviament per indigenas ed indigens da Domat.
Sch'il Gottard è plain – s'emplaina er il San Bernardino
La ruta dal San Bernardino è ina ruta alternativa a la ruta tras il Gottard. Plinavant vegn ella era recumandada durant il temp da las colonnas al Gottard. Questa fin d'emna è era il Gottard stà surdumandà ed ha registrà colonnas da fin 20 kilometers la sonda avantmezdi. Vers las sairas è la situaziun mintgamai puspè sa calmada. Glindesdi da mezdi mesirava la colonna al Gottard puspè 18 kilometers – quai che munta in temp da viadi pli lung da 3 uras.
