En sasez è l'Implenia mitschada cun in egl blau dals embrugls da cartel grischuns. Perquai che l'interpresa da construcziun ha cooperà cun la WEKO, n'ha ella betg survegnì multas savuradas sco ils auters cartellants. La WEKO ha dentant relaschà il 2019 ina disposiziun cun in scumond explicit: L'Implenia na dastga betg pli far cunvegnas da pretsch illegalas e betg pli sa participar a cartels illegals. Quest scumond vala per l'entira Svizra.
Pertge ha l'Implenia recurrì cunter quest scumond? La finala èn cartels gea gia scumandads tenor lescha. Tge fa la differenza? La raschun per la disposiziun da la WEKO: En cas che l'Implenia cuntrafa puspè al dretg da cartel e vegn traplada, po la WEKO punir l'interpresa senza percurrer las lungas proceduras da dretg da cartel.
Implenia ha quittà che las mesiras èn betg giustifitgadas
En ses recurs ha l'Implenia fatg valair che questa disposiziun saja exagerada, pertge ella na valia betg mo per il Grischun, mabain per l'entira Svizra. Plinavant na saja ella er betg limitada pertutgant sia durada.
Il tribunal federal – sco gia la preinstanza – refusa il recurs da l'interpresa da construcziun e dat raschun a la WEKO. L'Implenia haja cuntrafatg repetidamain a la lescha da cartel e quai en differents chantuns, declera il tribunal federal en sia sentenzia publitgada oz.
Igl existia perquai il privel che l'interpresa cuntrafetschia danovamain al dretg da cartel. La disposiziun cun il scumond explicit saja pia commensurada.
Sentenzia 2C_782/2021 dals 14 da settember, publitgada ils 19 d'october 2022
