Il temp da tschaiver è qua. Quest onn è l'emprim onn suenter dus onns cun restricziuns da corona. Per las guggas ed uniuns è quai in levgiament. Inqual dad ellas ha patì dal temp cun restricziuns ed er pers commembras e commembers, uschia per exempel la gugga da Domat, ils Moorschlümpf. Els hajan daquai da 20 persunas pli pauc ch'anc avant 3-4 onns. Er autras guggas dumandadas han sentì in regress da commembras e commembers. Quai na saja dentant betg be in effect da corona mabain insumma in fenomen ch'i saja pli grev da motivar e gudagnar persunas che s'engaschan en uniuns.
L'interess da la giuventetgna per tschaiver ed uniuns n'è forsa betg pli tuttina grond.
Ma betg tuts da las guggas dumandads han pers commembers ils davos onns. La gugga da Sedrun, ils vagabunds, èn restads constants e survegnan en media mintg'onn tschintg novs commembers e commembras. Tenor la presidenta, Anita Duff, saja il recept per il success la reclama ch'els fan durant l'entir onn en las scolas, ma era la buna atmosfera en la gugga.
Nus prendain tut forsa pli luc ch'autras uniuns e nus vulain ch'ils commembers han plaschair tar nus e ch'i na saja betg in stuair per els da vegnir tar las provas.
Era sche l'ina u l'autra gugga ha gì in grev temp è la motivaziun uss tant pli gronda. Suenter ils onns da corona sa legran las guggas dumandadas uss da finalmain savair festivar tschaiver sco usità e sa preparan per sunar als differents tils.
