Il virus da tschaiver ha Justin Meyer survegnì da sia mamma. La Lucernaisa ch'è vegnida avant bunamain 60 onns en il Grischun haja adina celebrà il tschaiver. Ch'el vegnia in di ad esser il maister da mastergnanza da la Fischlizunft da Rickenbach n'ha Justin Meyer mai ristgà da siemiar. La surpraisa, dentant er il plaschair saja stà immens cura che sia antecessura ha contactà el en ina procedura secreta, sch'el avess interess dal post d'onur. Ch'in Grischun daventa per in onn la persuna la pli impurtanta dal tschaiver da Rickenbach è in novum – quai saja dentant er in mussament che tut è pussaivel en il temp dals nars.
Responsabladad
Il maister da mastergnanza ha en il temp da tschaiver ina gronda responsabladad. El è la fatscha dal tschaiver, la persuna da contact ed oravant tut proclamescha el il motto dal tschaiver. Justin Meyer ha sa decidì per «Viva la Grischa – patschifig unterwegs», quai saja betg unicamain in motto, ma er ina tenuta per il tschaiver 2023 a Rickenbach.
