En il Partenz duain ils tschiervs era vinavant vegnir intercurids sin tuberculosa. La raschun saja, ch’i dettia era vinavant cas da tuberculosa en il Montafon en l’Austria, datiers dal cunfin tar il Grischun. L’Uffizi per la segirezza da victualias e per la sanadad d’animals ha prolungà las mesiras da surveglianza fin la fin dal 2027.
Surveglianza intensiva cuntinuescha
Fin oz n'hai anc betg dà in cas da tuberculosa tar tschiervs en il Grischun. Per garantir che quai restia uschia e per evitar in scenari zunt problematic en il Parc Naziunal Svizzer stoppian ils tschiervs – ch'èn vegnids sajettads u vegnids chattads crappads – vinavant vegnir intercurids sin tuberculosa. La finamira saja, tenor Giochen Bearth, il manader da l’Uffizi per la segirezza da victualias e per la sanadad, d'examinar circa 30% dals animals.
Cunquai che la situaziun al cunfin è sa midada avain stuì instradà in uschenumnà territori d'observaziun.
L'onn 2024 eran quellas mesiras pli intensivas vegnidas instradadas, suenter che l'uffizi chantunal aveva constatà intgins cas da tschiervs infectads datiers dal cunfin. Per impedir che l'epidemia d'animals dal Montafon sa derasia en direcziun dal Grischun e per pudair reagir ad uras è da lez temp vegnì definì ina zona d'obeservaziun en il Partenz.
En ils territoris communals da Seewis, Grüsch, Schiers, Luzein, Küblis e la fracziun Saas a Claustra han lieu dapi lura controllas pli intensivas. Questas controllas ed observaziuns intensivas duain pia cuntinuar fin il 2027 en la zona gia definida.
Er il scumond da pavlar vala vinavant
Dapi l'onn 2016 vala in scumond per persunas privatas da pavlar selvaschina d'ungla (tschiervs, chavriels, chamutschs, capricorns) en la regiun da cunfin cun il Vorarlberg e cun il Tirol. Il scumond è vegnì prolungà danovamain per ina durada illimitada. Per realisar tant la mesira dal scumonda da pavlar sco er quella da l'observaziun è l'uffizi tenor Giochen Bearth avisà fermamain sin il sustegn da chatschaders e chatschadras sco er dals purs e da las puras en la regiun.
En il mender cas duvrassi mesiras radicalas
L'october dal 2024 aveva il veterinari chantunal, Giochen Bearth infurmà ch'el saja alarmà pertutgant la tuberculosa tar ils tschiervs en il territori dal Montafon sur il cunfin en l'Austria. En in'intervista cun RTR aveva el da lez temp mess a lieu ils privels e las consequenzas pussaivlas d'ina derasaziun da la malsogna.
Dus cas da tuberculosa en il Montafon eran vegnids cumprovads la stad dal 2024. Sinaquai ha il chantun prendì mesiras pli fermas per impedir ina derasaziun en direcziun Grischun.
Ils dus tschiervs eran vegnids sajettads la fin d'avust 2024 sin il territori da l'alp Tilisuna en il Gampadelstal (Montafon). En il rom d'in program da surveglianza eran quels vegnids testads sin tuberculosa cun agid da la metoda PCR – il resultat dal test è stà positiv.
Sche la malsogna arrivass propi en il Grischun, pudess'ins be cumbatter ella cun intensivar la chatscha ed uschia sajettar grondas quantitads da tschiervs. In scenari zunt problematic fiss dentant sche tschiervs infectads arrivassan en il Parc Naziunal Svizzer – perquai ch'intervenziuns da l'uman èn da princip scumandadas là.
Tuberculosa sco grond privel per il Parc Naziunal Svizzer
Fin ussa n’han ins anc betg registrà cas en il Parc Naziunal Svizzer. Excluder ch'i pudess dar cas da tuberculosa en l'avegnir, na pon ins dentant betg. E sche tals cas vegnissan documentads, lura vegniss la lescha d’epidemia en vigur. Per metter a lieu la situaziun sco era il privel e las consequenzas pussaivlas ha RTR visità il Parc Naziunal Svizzer l'onn 2024.
Sche la lescha d'epidemia giess en vigur, avess quai tenor Flurin Filli, vicedirectur dal parc naziunal, consequenzas fitg negativas. Il chantun pudess alura numnadamain pretender la chatscha sin las bestgas infectadas en il parc naziunal.
Quai cuntrafaschess a la filosofia dal Parc Naziunal Svizzer. A mai faschess quai mal da lubir la chatscha en il Parc Naziunal Svizzer, nua che la natira duai vegnir surlaschada ad ella sezza.
Tenor Flurin Filli saja la chatscha sin tschiervs en il parc naziunal schizunt cuntraproductiva. Ussa s'inscuntran ils tschiervs en blers lieus en il parc naziunal. Entras ina chatscha dettia dentant pli paucs lieus nua ch'ils tschiervs vegnissan ensemen. Quests lieus fissan per las bacterias che chaschunan la tuberculosa terren favuraivel per siglir da bestga a bestga, uschia che la situaziun daventass bler pli precara.
Or da l'archiv