Martin Wieland è ortulan cun corp ed olma. Ils davos onns haja ses cor d'ortulan dentant patì ferm. Ma in suenter l'auter.
L'um da 67 onns, che n'ha negin descendents, ha avant 10 onns surdà l'orticultura cun 35 collavuraturs ad Andreas Blumer e Pascal Keller. La part construcziun d'ierts, manada dad Andreas Blumer è ida concurs suenter be quatter onns. Pascal Keller ha manà l'orticultura enfin la fin da l'onn passà. Gugent avess el cumprà la parcella cun las serras, preferenza ha dentant survegnì in'autra firma. Keller fa vers Wieland la renfatscha da betg avair sa tegnì vi da cunvegnas. Wieland sez respunda, ch'ins saja sa tegnì vi dal contract da 10 onns. Keller haja mai signalisà cler l'interess. Pretensiun cunter pretensiun.
El haja stuì constattar ch'il manaschi da l'orticultura giaja en decadenza, dischurden sin l'areal ed adina puspè saja el vegnì contactà da terzs ch'el fetschia meglier da guardar da l'orticultura che da far politica. Retrospectiv saja quai stà in sbagl da surlaschar er il num als fittadins. Da vender il terren saja adina era stada ina opziun e cun stuair constattar il svilup haja el nizzegià quella.
La fin d'ina istorgia da famiglia
Il 1940 ha il bab Meinrad fundà l'orticultura. Schon il 1950 è vegnida preschentada l'emprima «Dahlienschau» ed enfin il 2014 é quella exposiziun stada la spezialitad da l'ortcultura Wieland. Il 1965 cura che la via chantunala da la Surselva è vegnida averta saja quai stà sco in motor supplementar per l'orticultura. Sin enfin 5'000 meters quadrats ha la famiglia Wieland cultivà fluras. Sieva dal 1982 han ils dus frars manà l'orticultura, il 1995 ha Martin Wieland surpiglià il post da mainagestiun. Ins haja gì fitg buns onns.
Martin Wieland è persvas ch'ins sa manar cun success in affar da construcziun dad ierts e ch'ina orticultura spezialisada sin qualitad e cussegliaziun ha bunas schanzas sin la fiera – er sche grossists vegnan adina pli ferms. Ch'il num Wieland è svanì ussa en la branscha d'orticultura saja d'acceptar. En ils lieus da l'anteriura orticultura Wieland possia ussa nascher insatge nov.
