Siglir tar il cuntegn

Header

audio
Sentan ortulans la primavaira turbulenta?
Or da Actualitad dals 08.05.2024. Maletg: RTR
laschar ir. Durada: 4 minutas 1 Secunda.
cuntegn

Orticultura Wieland a Tumein Fatgs e trends or dal mund da las plantas

Ha l'aura turbulenta da questa primavaira in'influenza sin la fatschenta d'orticultura? Nus avain dumandà Roland Keller, possessur da l'orticultura Wieland a Tumein. El dat era tips ed infurmescha davart trends actuals da plantinas.

La primavaira è il temp nua che las amaturas ed ils amaturs d’iert pon puspè entschaiver cun lur lavur en il verd – preparar il terren, metter en plantinas e plantar fluras, uschia ch’els pon prest admirar ellas en tuttas colurs u avair l’agtna verdura sin taglier.

Ma fin uss è la primavaira sa mussada plitost da sia vart turbulenta – cun temperaturas da stad, ch'èn lura prest puspè crudadas tar il punct da schelira, e blera plievgia. Quai po er esser ina sfida per quels che tgiran lur iert, sco ortulanas ed ortulans da hobi.

audio
È far iert ina sfida? Nus avain dumandà ils amaturs e las amaturas d'iert.
ord Actualitad dals 08.05.2024. Maletg: Keystone
laschar ir. Durada: 2 minutas 10 Secundas.

Orticultura Wieland: Sentan els l'influenza da la primavaira turbulenta sin lur fatschenta?

Tenor Pascal Keller n'ha l'aura da primavaira plitost grischa e bletscha betg gì in grond effect sin sia fatschenta d'orticultura. Pli impurtant saja ch'i fa bellla aura il mars, quai ch'era per cletg il cas.

Pascal Keller raquinta ch'els cultiveschan tut ils legums sez – davent dal semnar, il metter en cups e la tratga. Tar las fluras saja quai different. Tschertas fluras semnian els era sez, autras fluras vegnian importadas sco plantinas pitschnas da l'Ollanda e lura tratgas si a Tumein.

Mumentan èn fluras per avieuls fitg popularas tar nossa clientella.
Autur: Pascal Keller Possessur orticultura Wieland
audio
Pascal Keller: Trends da flurs & tips
ord Actualitad dals 08.05.2024. Maletg: RTR
laschar ir. Durada: 4 minutas 2 Secundas.

Tenor Pascal Keller sajan las cundiziuns uss bunas per plantar salata u colrava, cunquai ch'igl è anc in zic bletsch ordadora ma vegnia uss lura puspè pli bel. Per metter las tomatas ed ils zuchettis en iert recumanda Keller d'anc spetgar in'emna.

Fluras ch'èn adattadas per l'aura actuala – per exempel sin il balcun – sajan geranias, petonias u salvias. In tip per ils quals che n'han forsa betg in polisch verd: Il geranium saja cunzunt ina flura ch'è fitg simpla da tgirar, di Keller – ella survivia era cun memia bler u memia pauc'aua.

Or da l'archiv:

RTR actualitad 07:00

Artitgels legids il pli savens