L'Uffizi per la natira e l'ambient dal Grischun ha intercurì la biodiversitad grischuna. Ils documents correspundents mussan, nua ch'ella è periclitada:
Tenor l'uffizi è la situaziun critica per tut las spezias en spazis da viver liads a l'aua. Lur populaziuns sajan decimadas. Era la situaziun per las spezias da la categoria «spezialists da biotop» saja pegiurada en general tenor ils experts e las expertas. Per meglierar lur situaziun dovria grondas stentas.
Quai vul la regenza far
Ella haja prendì enconuschientscha dal rapport e la strategia e veglia la metter enturn en duas etappas (2023-2028, 2029-2032). La realisaziun duai funcziunar via «promoziuns» per decisiuns ed in sa cuntegnair persistent e senza scumonds e prescripziuns, annunzia il cusseglier guvernativ Jon Domenic Parolini che maina il departament per furmaziun, cultura e protecziun da l'ambient.
En il rapport ha l'uffizi er elavurà ina strategia da mantegnair la biodiversitad ensemen cun radund 80 persunas dal fatg. La strategia saja «fundada» e cumpiglia mesiras concretas, scriva la regenza en la communicaziun. La strategia propona radund 30 mesiras. Quellas tanschan davent da mesiras sco chapir ed ir enturn precautamain cun funtaunas d'aua, sur crear e tgirar spazis biodivers tar stabiliments dal chantun fin tar mantegnair spezias raras e cumbatter neofitas.
Fin ils 6 d'october po uss er ina e scadin sa participar ad ina retschertga, commentar las mesiras ed ideas sco er agiuntar atgnas ponderaziuns. L'atun duain ils resultats esser sin maisa. Parallel èn planisadas differentas occurrenzas per sensibilisar per il tema.
