Curt suenter las 16:30 è in automobilist dad 80 onns charrà da Cuira nord direcziun Zezras sin l'autostrada A13. Sin l'autezza da Trimmis ha el tutgà la saiv directiva entamez la via. Là hai gì in'avertura da la saiv directiva uschia che l'auto è vegnì sin l'autra vart da la via ed è uschia collidà cun in auto che vegniva encunter. Silsuenter è in ulteriur auto collidà cun la saiv directiva ch'è stada disfatga sin fundament da l'emprim auto ch’ha tuc quella. Da la vart dal sid è in auto collidà cun in'apparatura che flaivlenta collisiuns ch'era avant vi da la saiv directiva. L'um dad 80 onns è vegnì transportà en l'ospital chantunal da Cuira.
Lavurs da rumida pretensiusas
Pervi da la saiv directiva defurmada ha l'autostrada A13 stuì vegnir serrada sin omaduas varts. Durant pliras uras ha la polizia svià il traffic sur la via chantunala. Uschia hai dà gronds impediments da traffic en l'entira Val dal Rain. Curt avant las 19:00 ha in vial en direcziun sid pudì vegnir avert, las 20:40 lura omadus.
Il caos è stà grond
D’ina vart è il traffic uschia stà airi davent da Rehanau, da l'autra vart er en il nord davent da Maiavilla. Las vias chantunalas en direcziun Cuira èn stadas surchargiadas dal tut ed era il traffic en la citad da Cuira sa muventava strusch. Per impediments supplementars ha la finala anc procurà la «Maiensässfahrt» tradiziunala dals scolars da la citad da Cuira.
-
Bild 1 von 11. Ils autos donnegiads stattan al ur da l'autostrada. Bildquelle: mad.
-
Bild 2 von 11. L'auto era vegnì tras in'avertura da la saiv directiva sin il vial oppost. Bildquelle: mad.
-
Bild 3 von 11. In manischunz dals bus da Cuira n'è betg incantà dal traffic. Bildquelle: RTR, Michel Decurtins.
-
Bild 4 von 11. Tras la citad da Cuira hai era in u lauter plazzal da bajegiar, quels fan era lur part per impedir il traffic. Bildquelle: RTR, Michel Decurtins.
-
Bild 5 von 11. Ina persuna ha gì nagin gust pli da spetgar en colonna ed ha parcà a l'ur da la via dasper la rondella dal Quader Center a Cuira. Bildquelle: Michel Decurtins.
-
Bild 6 von 11. Colonna d'autos amez Cuira. Bildquelle: RTR, Michel Decurtins.
-
Bild 7 von 11. Tgi ch'è stà da viadi cun velo u a pe ha gì dapli success ch'ils automobilists. Bildquelle: RTR, Michel Decurtins.
-
Bild 8 von 11. La colonna a Cuira vis en in spievel d'auto. Bildquelle: RTR, Sabrina Bundi.
-
Bild 9 von 11. Gnanc la polizia po pli far insatge. Bildquelle: RTR, Michel Decurtins.
-
Bild 10 von 11. Tut stat eri sin l'autostrada A13 en il Grischun dal nord. Bildquelle: RTR, Gian-Marco Maissen.
-
Bild 11 von 11. La Maiensässfahrt da Cuira ha era procurà per traffic supplementar en la citad. Bildquelle: RTR, Michel Decurtins.
Era accident avant il tunnel dal Gottard
Dasper l’accident sin l’autostrada A13 pudess in accident sin la ruta dal Gottard esser stà in'ulteriura raschun per ils gronds problems da traffic en la Vallada dal Rain da Cuira. Avant il portal sid dal tunnel dal Gottard è in camiun charrà en in ulteriur camiun. Quel sa chattava a la fin d'ina colonna, in dals camiunist è mort. Pervi da l'accident è l'autostrada stada serrada pliras uras.
RR novitads 18:00