Siglir tar il cuntegn

Header

cuntegn

Avertura territoris da skis Decisiuns da l'exteriur spartan las opiniuns dals turistichers

Las regenzas da l'Italia, da la Frantscha sco er da la Germania han decidì da laschar serrà ils territoris da skis sur Nadal e Bumaun. En Svizra è la devisa tenor cusseglier federal Alain Berset actualmain d'avrir els cun concepts da protecziun severs. Però n'è quai betg anc sacrosanct.

La destinaziun Engiadina San Murezzan cusseglia uss als turistichers da la regiun da desister da far reclama per giasts da l'exeriur. Uschiglio pudessi il Cussegl federal vegnir anc pli fitg sut pressiun da reponderar sia tenuta positiva envers il turissem d'enviern.

video
Berset: «Avertura da territoris po chaschunar tensiuns politicas»
Or da News-Clip dals 26.11.2020.
laschar ir. Durada: 1 minuta 30 Secundas.

Betg laschar cumandar

Il mainafatschenta dal las Pendicularas dal Grischun, Marcus Gschwend è da l'avis che quai saja ina chaussa dals pajais vischins. L'Italia, la Germania e la Frantscha stoppian guardar sez che lur burgais stettian a chasa enstagl da vegnir en Svizra. Quai na giaja betg da vulair cummandar sin la Svizra, uschia Marcus Gschwend envers il Schurnal regiunal da Radio SRF.

El ha plinavant fatg attent che reducir las pussaivladads da duvrar las pendicularas pudess era avair in effect nungiavischà: La glieud enqueria gist en quests temps pussaivladads da giudair l'aria frestga e la natira. E sche il diever da las pendicularas fiss restrenschì, pudessi capitar che anc pli blers tschertgassen lura in plaz en ils vitgs, sin sendas da viandar u tar autras activitads betg al culm.

audio
Per tadlar – las novitads da las 06:00
ord RTR Audio dals 28.11.2020. Maletg: RTR
laschar ir. Durada: 3 minutas 53 Secundas.

«Star luc e calm»

La Svizra duai vinavant laschar avert ils territoris da skis e decider autonom co manar il cumbat cunter la pandemia da corona. Quai manegia il president da las pendicularas svizras, Hans Wicki. Ed el appellescha da restar luc e calm malgrà las pretensiuns da plirs pajais vischins, da serrar ils territoris da skis.

En Svizra sajan intgins territoris averts dapi dus mais, senza daventar ina fuaina da virus, ha il president da Pendicularas Svizra ditg en la «Samstagsrundschau» da Radio SRF.

En Germania: Maioritad per serrar tut ils territoris da l'Europa

En Germania fiss ina gronda maioritad per serrar ils territoris da skis en l’entira Europa. Quai mussa in’enquista represchentativa d’in institut demoscopic per incumbensa da la gasetta «Augsburger Allgemeine».

74% da las persunas dumandadas han inditgà ch’i saja cleramain u plitost gist da serrar temporarmain tut ils territoris da skis europeics, per limitar la pandemia da corona. Stgars 20% dals dumandads èn da l'avis ch'i saja plitost u cleramain fauss da serrar tut ils territoris da skis. A l’enquista han participà 5’000 Tudestgas e Tudestgs.

RTR novitads 06:00 +

Artitgels legids il pli savens