Siglir tar il cuntegn

Header

cuntegn

Concept militar a Cuira «Il resultat talmain cler surpassa tut nossas spetgas»

La citad e la vischnanca burgaisa da Cuira barattan terren. Il suveran da Cuira ha approvà il barat. Uschia saja l'emprim pass per spustar la caserna dal militar sin il Rossboden dumagnà, ha ditg il president da la citad da Cuira Urs Marti.

Il suveran ha approvà da barattar il terren en valita da 7,1 milliuns francs sin il Rossboden per construir là ina nova caserna. Il resultat è cler cun 75,74% da las vuschs. Er la vischnanca burgaisa ha approvà la midada.

Barat da terren

GEA 75.74%, Na 24.26%

Resultat

Uschia surpiglia la citad da Cuira uss il terren tar il Rossboden. Persuenter survegn la vischnanca burgaisa las parcellas da la citad a Lachen e tar il Lindenquai.

Grafica mussa il barat da terren a Cuira
Legenda: Il barat: Duas parzellas al Rossboden van a la citad da Cuira - persuenter survegn la vischnanca burgaisa trais parzellas al Lindenquai e Lachen. RTR, Grafica

Il parlament da Cuira aveva dà la fin november ses consentiment al barat, quai cun 16 cunter 2 vuschs. Critica avevan lura cunzunt La Verda, ils burgais-democrats e la PPS exprimì pervi dal pretsch memia favuraivel per il terren en la zona agricula.

Nova caserna sin il Rossboden

Il barat da terren tranter la citad e la vischnanca burgaisa è stà l'emprim pass per spustar la caserna dal militar or da la citad da Cuira. Il president communal, Urs Marti è da buna fai ch'era la segunda votaziun vegn a gartegiar.

En in segund pass sto il suveran decider davart ils daners per cumprar il terren da la caserna. Pir lura po il militar construir la nova caserna sin il Rossboden. Sin l'areal da la caserna veglia da l'armada duai suenter dar plaz per abitar, lavurar e per il diever public.

RTR votaziuns 14:00

Dapli da Grischunavrir la Landingpage

Nach links scrollen Nach rechts scrollen