Siglir tar il cuntegn

Ulteriur Grischun Cuminanza croata tuttina loscha da lur equipa

Fertant ch'entgins han persequità il final dal campiunadi mundial a chasa sin il canapé han auters visità in public viewing. Uschia era Mike Yuric ensemen cun ina gruppa da fans croats a Cuira.

El na saja betg in grond fan da ballape, ma il campiunadi mundial u il campiunadi europeic persequiteschia schon el, declera Mike Yuric. Avant il gieu è el optimistic: «Jau crai ch' ils Croats han bunas schanzas e sun plain fidanza. Els èn la finala era vegnids en il final.»

Ils fans croats sa radunan enturn la maisa ch'els han spezialmain reservà per quest gieu. Gia suenter bi e bain 20 minutas croda l'emprim gol dals Franzos – respectiv l'autogol dals Croats. Mike Yuric e ses bab guardan in sin l'auter e scrolan il chau. Discurrì na vegn betg bler. Ils fans sa concentreschan, lur egliada adina drizzada vers il gieu.

I na va betg ditg ed ils Croats sajettan lur emprim gol. Ils fans siglian si, giubileschan e tegnan si la bandiera. Era suenter il segund gol dals Franzos resta Mike Yuric anc optimistic.

Els stattan adina puspè si ed igl è schon pussaivel ch'els fan anc in u schizunt dus gols.
Autur: Mike YuricFan da la squadra croata

Pir cura ch' il terz e quart gol dals Franzos èn fatgs na sent'ins betg pli gronda speranza. Bain pon ils Croats sajettar in segund gol, ma campiun mundial daventa la Frantscha. Fertant ch' il president franzos, Emmanuel Macron, embratscha la presidenta croata, Kolinda Grabar-Kitarović, applaudeschan ils fans croats en la Vögele Arena era per ils victurs. Bain saja el dischillusiunà da quest resultat, manegia Mike Yuric.

Jau pens ch'il segund plaz n'è er betg schlet ed ils Croats han mussà ch'els han in grond cor. Nus essan tuttina loschs.
Autur: Mike YuricFan da la squadra croata

RR actualitad 07:00