L'Uffizi federal da vias ASTRA resguarda uss arguments da la regenza e dals vitgs. Quai po però durar in temp. La primavaira vulan els communitgar, sch'els vegnan a construir la gallaria da segirezza sco planisà u sch'ins mida il plan e suonda als giavischs da la regenza e dals vitgs.
Sche l'ASTRA mida il plan ston tut ils projects vegnir elavurads da nov. La construcziun da la gallaria vegniss damai a sa spustar per plirs onns. Plinavant ston els lura far quint cun reclamaziuns dad autras varts, sco da las organisaziuns per la protecziun da la natira.
Tge era planisà?
La proposta dal plan da l'Uffizi federal da vias prevesa il suandant: Sper il tunnel Isla Bella vegn construì ina gallaria da segirezza. Tras quella po la glieud svanir – per exempel en cas da fieu. Prevì fiss da construir la gallaria dal 2020 fin 2022. Suenter vul l'ASTRA renovar il tunnel Isla Bella sez per ch'el adempleschia ils standards da segirezza actuals.
In problem dal tunnel è la vapur. Cura ch'i è dador pli fraid che tschintg grads, vegnan las fanestras dals autos plain vapur, subit ch'els vegnan en il tunnel. In grond ristg da segirezza. Durant ch'il tunnel vegn renovà, vegniss il traffic tras svià tras ils vitgs enturn, dimena tras Panaduz.
Proposta dals vitgs e la regenza
La regenza ed ils vitgs en il conturn proponan da construir la gallaria da segirezza pli gronda che planisada. Numnadamain uschè gronda, ch'ins pudess duvrar la gallaria sco sviament durant las renovaziuns dal tunnel. Uschè n'avess Panaduz nagin caos da traffic durant las renovaziuns. Pli tard pudess ins duvrar la gallaria sco segund vial. Uschia vegniss er il ristg da colonnas pli pitschen.
RR actualitad 08:00
