Siglir tar il cuntegn

Header

purtret da la citad
Legenda: La citad da Cuira. Keystone
cuntegn

Inventari da la citad Critica envers il cussegl da citad da Cuira

Il cussegl da la citad da Cuira haja reducì l'inventari da la citad a moda subjectiva ed intransparenta da 267 sin 242 objects. Quella renfatscha fa la Protecziun da la patria grischuna ensemen cun las federaziuns professiunalas SIA, BSA, SWB e Visarte.

Uschia midia il cussegl da la citad a moda arbitrara ina glista dals edifizis degns da proteger, scrivan las organisaziuns en lur posiziun. Per determinar edifizis ch'èn degns da proteger dovria in'elecziun cumpetenta e transparenta. Las organisaziuns pretendan che l'inventari da la citad vegnia anc ina giada exponì publicamain.

Stritgadas arbitraras

Sco las federaziuns scrivan saja l'intent d'in inventari da citad da mussar tge edifizis ch'èn degns da protecziun e betg da mussar tgenins ch'èn protegids. L'inventari ch'il cussegl da citad proponia saja subjectivs e perdia uschia sia valur d'in document specific dal fatg ed ins na possia betg duvrar el cura ch'i giaja per planisar. Las organisaziuns partan dal fatg che la citad haja gì raschuns politicas ed economicas per stritgar tscherts edifizis or da l'inventari. Uschia renfatschan els che la citad veglia avair davent il bain «zur Kante», perquai che quel saja enta pe ad in project da vias da la citad. Cun pigliar quel or da l'inventari fissia il problem «schlià».

Nova proposta necessaria

Las organisaziuns scrivan ch'i saja impurtant da stgaffir transparenza e d'avair in inventari che saja confurm als fatgs e betg motivà politicamain. Qua giaja er per tractar tuttina tut ils possessurs da bajetgs degns da proteger.

Perquai pretendan las organisaziuns che l'inventari vegnia anc ina giada publitgà danovamain cun tut ils documents d'inventari necessaris. Quest inventari saja d'esser elavurà ensemen cun ils gremis d'experts.

Citad vul far midadas

La citad da Cuira vul anc ina giada reveder l'inventari dals bajetgs degns da proteger. Quai ha ditg la nova suprastanta da la citad responsabla, Sandra Maissen. Envers il schurnal regiunal da SRF, ha ella dentat er declerà ch'ella saja surstada da l'agir da las organisaziuns:

audio
Sandra Maissen: «Quellas fundaziuns n'han betg tschertgà il discurs cun mai»
00:17 min, RTR Audio dals 22.02.2021.
laschar ir. Durada: 00:17 minutas.

Il dialog vegnia uschia engrevgià. Ma la citad giaja uss anc ina giada tras la glista. Ch'i dettia però ina nova ediziun na crai ella betg.

RTR novitads 12:00

Artitgels legids il pli savens

Scrollar a sanestra Scrollar a dretga