Siglir tar il cuntegn

Header

Arena da biatlon a Lantsch cun ina passlungista.
Legenda: Baul la damaun hai anc plaz en l'arena da biatlon a Lantsch. RTR/ Angela Hendry
cuntegn

Lantsch/ Lai Boom da passlung er grazia a corona

Il sport da passlung è gia dapi intgins onns in trend. Ma grazia a corona chatta anc dapli glieud la via sin las loipas. Ils pass svizzers da passlung èn daventads scarts, fatschentas da sport han affittà bler urden da passlung, las loipas èn bain frequentadas.

Radund 5’500 kilometers loipas spetgan en Svizra ils passlunghists e las passlunghistas. Ils sport è il mument pli popular, cunquai ch’ins na sto betg ir cun autras persunas en ina gondla, sco per exempel tar skis alpin, manegia Mariette Brunner, la presidenta da Loipa Svizra.

Vendì blers pass svizzers da passlung

Cifras definitivas, quants pass ch’èn gia vegnids vendids, na datti naginas. La presidenta è dentant persvadida ch’i dettia in bun onn da passlung en quest reguard.

Quai vegn a dar ina stagiun excellenta. Sch’i dat in record na sai jau betg anc dir, i vesa dentant ora fitg bain.
Autur: Mariette Brunnerpresidenta Loipen Schweiz

Tranter 28’000 e 32’000 pass svizzers da passlung vegnan vendids en in onn normal. Las cifras definitivas èn avant maun l’entschatta d'avrigl.

Las scolas da passlung han profità dal coronavirus

Ernst Orlik instruescha dapi set onns passlung a Lai. Cunquai che la glieud na po betg viagiar grond, stettia ella en la regiun ed emprovia novs sports, sco per exempel passlung.

Ernst Orlik cun skis da passlung.
Legenda: Ernst Orlik lavura dapi 7 onns sco scolast da passlung a Lai. RTR/ Angela Hendry

Quest onn haja el gì dapli principiants e persunas, che faschevan gia ina giada passlung e che vulevan puspè cumenzar. Gist enturn ils dis da festa haja quai gì blera glieud sin las loipas.

Ins vegn dentant adina da guntgir in a l’auter. Jau persunalmain hai gugent, sch’ins vesa blera glieud, sch’i marscha insatge.
Autur: Ernst Orlikscolast da passlung

Material da passlung daventa scart

Tar la fatschenta da sport active sport Baselgia a Lai na pon ins betg pli fittar equipament da passlung per l’entira stagiun. Quai na saja anc mai stà il cas, di Marco Baselgia, il manader da la fatschenta. La glieud giaja bain cun skis, dentant pli curt, cunquai che las ustarias sajan serradas, e lura dovrian els anc in ulteriur sport.

Blera glieud dentant avunda spazi

Passlunghists e passlunghistas a Lai conferman, ch’i haja bler dapli glieud sin las loipas. Esser en la natira, pudair glischnar, sentir la libertad, era en il chau, sa muventar e giudair il silenzi, quai saja il bel vi dal passlung. E malgrà ch’i haja dapli glieud – il spazi saja tuttina grond avunda.

Ina loipa en il guaud da Lai cun in passlungist.
Legenda: Sin la loipa sa repartan ils sportists e las sportistas bain. RTR/ Angela Hendry

Intgins tips

Tge dovri per in bun start en la loipa, sco principiant u principianta da passlung?

RTR actualitad 07:00

Artitgels legids il pli savens

Scrollar a sanestra Scrollar a dretga