Pervi da la fusiun da la PBD cun la PCD sin palc naziunal, datti en il Cussegl grond intgina midada persunala. Oliver Hohl (Cuira) e Benhamin Hefti (Tschintg vitgs) na midan betg da la PBD tar la nova partida «Allianza dal center». Hohl mida tar la PLD, Hefti tar la PPS. Quai han omadus confermà envers RTR.
Ils deputads Hohl e Hefti èn omadus vegnids elegids il 2018 per la PBD en il Cussegl grond. Els midan uss lur partida sco er la fracziun ch'els tutgan tiers. Er ina midada da partida fetschia Thomas Audètat, il vicepresident da la Dretgira administrativa. Malgrà questas midadas resta la PBD la terz ferma forza en il parlament.
Suprastanza da PBD Cuira sa retira en corpore
Er tar la PBD Cuira datti midadas: Ils commembers da la partida han la mesemna saira gì da decider davart la proposta da la suprastanza da schliar la PBD da la citad. La suprastanza vuleva uschia surlaschar a mintga commember da decider sez tar tge partida ch'el u ella veglia midar. Midar cun la PCD en la Allianza dal Center na saja stà nagina opziun valabla, ha l'anteriura suprastanza da la PBD Cuira communitgà la gievgia.
Cun 9 cunter 5 vuschs n'ha la proposta da schliar la partida dentant betg chattà la maioritad necessaria da dus terzs. Preschents a la radunanza èn stads 16 commembers. En consequenza è la suprastanza en uffizi sa retratga. Dajan Roman il president, Jörg Walter e Marco Tscholl hajan mess a disposiziun lur uffizis, stat scrit en la communicaziun da la partida da Cuira. L'anteriura suprastanza da la PBD Cuira vegn a midar tar la PLD, ha confermà Oliver Hohl.
La PBD Cuira exista suenter questa decisiun pia vinavant. Elegids da nov en suprastanza da la PBD Cuira èn Christoph Widmer sco president – l'um da l'anteriura cussegliera federala Eveline Widmer-Schlumpf – Christian Boner e Daniel Camenisch.
