Cun 336 cunter 25 vuschs han delegadas e delegads approvà la fusiun cun la Partida burgais-democratica. Per la fusiun hai duvrà la maioritad da trais quarts u 273 da las vuschs. Quai ch'è uschia cleramain cuntanschì. Ils delegads e delegadas da la PBD avevan gia dà lur consentiment a la fusiun avant duas emnas.
La radunanza da delegads da la PCD Svizra è stada en furma decentrala pervi dal coronavirus. La glieud è sa radunada en 13 differents lieus ch'eran colliads in cun l'auter sur video e nua ch'igl è lura er vegnì votà.
Betg il davos cun surpigliar la PBD dain nus era il signal che nus vulain s'avrir ed esser in grond center ed uschia er avair ina pli gornda muntada en l'avegnir.
Tenor la cussegliera federala cristiandemocratica Viola Amherd hajan las duas partidas ina finamira communabla, numnadamain tegnair ensemen la Svizra. Elavurar cumpromiss saja ina lavur dira. I rendia da gughegiar novas chaussas. Sche la nova partida haja success, dependia da la partida. I stoppia esser la finamira che la populaziun haja fidanza en «il center».
Cler Gea per «Allianza dal center»
Delegadas e delegads han plinavant approvà la proposta da midar num cun 325 da 383 vuschs. Quai è ina maioritad da 85% ed uschia è era la maioritad necessaria per midar num da duas terzas da las vuschs vegnida cuntanschida.
La partida perda il c sulettamain en il num. En il cor da la partida resta el vinavant. Igl è stà necessari da s'avrir per l'avegnir e da là nà benevent'jau fitg questa decisiun.
Cun il nov num vul la partida attrair ulteriuras gruppas da votants e votantas – ordaifer las regiuns tradiziunalas catolicas. Discussiuns hai cunzunt dà enturn la dumonda sche la partida na perdia betg sia identitad ed ina tenuta clera cun sa distatgar dal «cristian» en il num. Ils aderents da la midada han lura tranter auter er argumentà che la DNA da la partida na saja betg en il pachetadi, mabain en la partida sezza.
Igl è en in tschert senn er ina midada d'image cunquai che nus avain vis ch'il c è per part in impediment er per giuvens [...]. Dentant uschia essan nus uss pli libers er da gudagnar la glieud che patratga en il center.
Accentuà la rolla impurtanta sin livel naziunal
Tenor ils delegads saja la PCD u uss l'Allianza dal center la partida che tegnia ensemen la Svizra. Quella rolla possian ins represchentar meglier cun il nov num. Autras vuschs han però er accentuà che cun il nov num s'orienteschia la partida vid las autras partidas e betg vid in'atgna posiziun. Il resultat per midar num è la finala stà cler.
Tant delegadas e delegads sco er il president da la partida, Gerhard Pfister, han ditg ch'i na saja però betg fatg cun la midada dal num. Quai possia gidar per gudagnar tar las proximas elecziuns, però anc pli impurtant saja d'emplenir il «center» cun cuntegns.
Il nov num entra en vigur per la partida naziunala a partir dal prim da schaner 2021. Las partidas chantunalas han peda ils proxims quatter fin tschintg onns sch'ellas vulan suandar cun il num al la partida naziunala u restar tar PCD.
