Decidì ha la populaziun da la vischnanca da Claustra davart la parcella per l'hotel Montana. La parcella tutga a la vischnanca. Questa fiss vegnida vendida per 4,35 milliuns francs ad Immoville SA. En pli avess la vischnanca cumprà la chasa da parcar da l'hotel 230 parcadis per 11,27 milliuns francs.
Cler «na»
Ma il pievel da Claustra ha fatg in stritg tras il quint. I ha dà in cler «na» per la revisiun parziala da la planisaziun locala. La participaziun a la votaziun è stada tar 70,6%. 1'449 persunas han vuschà «na« e be 671 «gea», pia 68% da las vuschs èn stadas cunter il project.
Las votantas ed ils votants han validà ils ristgs da quai massa grond project gistamain e correctamain.
Clo Cuonz, l'iniziant da la cuminanza d'interess encunter il project d'hotel, haja sa chapescha sperà in «na». Dentant haja el quintà cun in resultat fitg stretg. Tenor Cuonz saja il resultat in segn, che la fidanza en las autoritads na sajan betg pli uschè buna.
Il parlament e la suprastanza avevan cusseglià da dir «gea» al project che preveseva la cumpra da 230 parcadis sutterrans e la revisiun parziala da la planisaziun communala. Ueli Marugg, commember dal cussegl da vischnanca e dal comité per il project è trumpà. Uss stoppia vegnir sclerì tge che duai schabegiar cun l'areal. Ina resposta haja Ueli Marugg uss dentant anc betg.
Plinavant ha la vischnanca approvà il budget dal 2018 ed il pe da taglia.
RR novitads 12:00+