Siglir tar il cuntegn

Ulteriur Grischun «Nus avain gì fitg gronds donns»

Las scheliras da l'avrigl passà han procurà per intginas notgs senza sien tar ils purs da fritgs. Uschia era tar ils Gislers che cultiveschan spargias e fritgs.

Stan cun fritgs.
Legenda: Tut para sco adina sin il stan dal martgà emnil da la famiglia Gisler. RTR, Gierina Gabriel

A l'emprima egliada na ves'ins nagut dals donns: Ils chanasters verds sin il stan da fiera dals Gislers a Cuira èn emplenids cun stgatlas d'apricosas, primblas ed ampuaunas. Però – la perdita saja stada fitg gronda, declera Selina Gisler.

Tar las primblas n'han bleras plantas insumma nagins fritgs. Quellas che creschan èn persuenter pli grondas.
Autur: Selina Gisler

Tar las apricosas na saja ina sort insumma betg creschida. La segunda haja gì enturn 20% dals fritgs usitads, e la terza e quarta sorta hajan gì pli u main fritgs. La raschun saja che las sorts madireschian e flureschian mintgamai da differents temps.

Naginas mesiras spezialas

Mesiras encunter las scheliras n'hajan els prendì naginas. «Nus n'avain pudì far nagut. Las plantas èn memia autas. Quai n'è betg sco tar las vignas. Il davos onn avain nus empruvà da simplamain ir enturn cun il tractor, quai n'aveva er betg gidà.» La vendita sin la fiera funcziuneschia anc, di Selina Gisler, ma la glieud saja bain conscienta ch'i haja paucas apricosas.

RR actualitad 07:00