Cuira duai realisar il «Chur Big Air Festival»
Ina cumbinaziun da concurrenza da sport da freestyle e d'in festival da musica: Per questa occurrenza ha il parlament da Cuira approvà unanimamain in credit da 660'000 francs. Tenor il parlament saja il event cun atletas, atlets, musicistas e musicists internaziunals ina buna schanza per far pli enconuschent la citad. Il festival duai attrair fin 20'000 persunas mintga di – l’emprima ediziun duai avair lieu ils 20 fin 23 d'october.
Il festival duai sa repeter mintg’onn. Quai muntass custs annuals da var 360'000 francs, plus ulteriurs fin 600'000 francs sco finanziaziun da partenza per ils onns 2022-2024. Per quai sto dentant anc la populaziun dar ses consentiment a l’urna, ha il parlament decidì.
Citad duai cumprar areal da caserna
Unanimamain ha il parlament sustegnì l'intenziun da vulair cumprar l’areal da la caserna a Cuira. Ils custs perquai muntan a var 36 milliuns francs. Sin l’areal da la caserna duai lura dar in nov quartier cun abitaziuns, parcs ed ina scola.
L’armada duai construir ina nova caserna sin l’areal dal Rossboden – là nua che l’armada ha schon sia plazza d’armas. Fin che Cuira pudess nizzegiar l’areal vai dentant anc fin almain il 2031 – lura pudess l’armada avair construì la nova caserna. Il suveran da Cuira sto anc decider a l’urna davart la cumpra da l’areal.
Inizaitiva cunter canera da sajettar
Il parlament da Cuira ha era tractà l’iniziativa cunter la canera da sajettar al Rossboden. Quella saja mo per part valaivla, uschia la decisiun. Sin la finamira da l’iniziativa da sbassar la canera da sajettar tar la plazza d’armas al Rossboden, n'haja la citad numnadamain nagin’influenza. La cumpetenza perquai saja tar la Confederaziun.
L’iniziativa vegn uschia mo per part davant la populaziun: La populaziun duai decider, sche la citad ha d’elavurar in reglament pli strict per ils stans da tir sin il Rossboden. Il parlament recumonda dentant da refusar l’iniziativa. Tenor el na sajan ils stands da tir betg la finamira principala da l'iniziativa.
Dapli locals da far provas
Cuira vul promover ateliers e locals da prova per occurrenzas culturalas. Il parlament ha approvà ina strategia generala per promover ils locals. La citad duai nizzegiar ils locals existents e crear novs, sch’i dat la pussaivladad. Ils locals duain esser repartids sin l’entir territori da la citad – duain dentant vegnir organisada d’ina administraziun centrala.
Il parlament ha uss incumbensà il Cussegl da la citad d’elavurar in concept e da planisar ils meds finanzials necessaris. Tenor missiva muntan ils custs a var 500'000 francs ad onn. Dà da discutar ha surtut la dumonda davart la Chasa Arcas en la citad veglia. Fertant che la PS vuleva integrar quella directamain en il concept, ha ina stretga maioritad dal parlament decis da betg far quai.
Approvà unanimamain il quint annual 2020
L'onn passà ha il quint da Cuira resultà in plus da 13,3 milliuns francs, quai tar expensas da passa 250 milliuns francs. Il parlament ha approvà quel unanimamain, ed el ha ludà il bun resultat. Deputads da la PLD e da la PPS han dentant fatg attent, che l’atgna finanziaziun saja sa sbassada ils davos onns. Il medem mument s’hajan ils custs d’investiziuns s’augmentadas.
Tenor il Cussegl da citad ha Cuira ina buna situaziun finanziala. Ins stoppia er investir per mantegnair Cuira sco citad attractiva. Cun il budget dal proxim onn veglian els dentant giustar il plan d’investiziuns.
