Siglir tar il cuntegn
cuntegn

Ulteriur Grischun Probabel nagin connex tranter incendis

Polizia chantunala sco er la procura publica na vesan actualmain nagin connex tranter ils incendis da l'ultim temp. Ina colliaziun tranter ils brischaments na stettia betg en il center da las examinaziuns. Quai han las autoritads confermà envers l'Agentura da Novitads Rumantscha ANR.

Pumpiers che stizzan il fieu en il depot dad autos da posta.
Legenda: Polizia e procura publica na vesan nagina colliaziun tranter ils incendis. MAD, Polizia chantunala

Ils experts d’incendis sajan londervi da sclerir las raschuns dals ultims incendis a Cuira ed a Domat, di Markus Walser, pledader da la Polizia chantunala. Davart ils detagls na fa el naginas indicaziuns. El sincerescha dentant:

Jau pos be dir che nossas examinaziuns na mussan nagins indizis ch’ils brischaments avessan ina colliaziun.
Autur: Markus WalserPledader da la Polizia chantunala

Dus experts d’incendis lavuran en il corps da la Polizia chantunala. Els èn era responsabels per dumondas e lubientschas per material explosiv. Da preschent èn els sa chapescha fatschentads cun examinaziuns. Sin la dumonda sch’els survegnian uss anc agid dad experts d’ordaifer, di Walser:

Els survegnan sustegn dal servetsch da la tecnica criminala da la Polizia chantunala.
Autur: Markus WalserPledader da la Polizia chantunala

Procura publica è daventada activa

Cun intgins da quests incendis sa fatschenta era la procura publica. Cronologicamain numna il pledader Franco Passini: Sco emprim èsi il brischament en la via Lürlibad a Cuira, nua ch’in um è vegnì per la vita. Sco segund èsi l’incendi nua ch’in bab e ses dus uffants èn morts. E lura intercureschian ins sa chapescha era l’incendi en il depot d’autos da posta.

Auter vesi ora tar il fieu tar la Ems Chemie e l’incendi da mesemna saira tar il provisori dal Convict a Cuira. Là n’haja la procura publica anc betg avert ina procedura e la polizia examineschia sezza la chaussa. Era Passini sincerescha ch’i na dettia fin uss nagins indizis per ina colliaziun.

Tenor noss manegiar èn questas disgrazias capitadas independentamain ina da l’autra.
Autur: Franco PassiniPledadader da la procura publica

La procura publica daventia activa, sche persunas sajan vegnidas blessadas u vegnidas per la vita, explitgescha Passini. Ma era sch’i sa tractia dad in grond incendi, sch’igl haja dà donns considerabels u sch’i dettia indizis ch’insatgi haja dà fieu. Sch’in brischament ha chaschunà mo pitschens donns e n’ha era betg destruì material da terzas persunas, sclerescha la polizia il cas en atgna reschia.

RR novitads 20:00