La chapitala Grischuna ha fatg il 2020 in gudogn da 13,3 milliuns francs. Quai èn var 10 milliuns dapli che budgetà. Las expensas totalas èn tar 252,9 milliuns francs, las entradas tar 266,2 milliuns francs.
Surtut dapli entradas da taglia hajan fatg la differenza en il quint ed hajan purtà 8,2 milliuns dapli che quintà. Plinavant hajan er custs pli bass tar il persunal custà 1 milliun pli pauc che quintà.
Corona custa tranter 3 e 4,5 milliuns francs
Tar ils indriz da sport ha la citad fatg var 1,1 milliuns francs pli pauc gudogn che planisà. Durant la pandemia èsi per part stà scumandà da far sport. Plinavant han las chasas da parcar en la chapitala prendì en pli paucs daners. Er quai fetschia or in pèr 100'000 francs.
Cun il surpli da taglia avain nus pudì cumpensar quai, che nus n'avain betg pudì incassar pervia dal coronavirus.
Cuira ha er mess a disposiziun in fond d'in milliun francs per las consequenzas dal coronavirus per sport e cultura. Mo var 20% – pia 200'000 francs – haja la citad dentant effectiv dovrà.
Investiziuns per projects futurs
Investiziuns nettas ha la citad fatg per 31,8 milliuns. Quai èn 23,1 milliuns pli pauc che planisà. Cun radund 10 milliuns è qua pertutgà il project Eisball. Ils ultims onns ha la citad augmentà ses agen chapital per investiziuns da 117 milliuns sin 607,9 milliuns. Uschia sajan las finanzas da la citad sin buna via e possian er finanziar las investiziuns.
