Siglir tar il cuntegn

Header

cuntegn

Schluccaments Las scolas medias e professiunalas avran puspè

Cun l'emprender a distanza han ins ils ultims mais fatg bunas experientschas. Per las ultimas emnas da scola na vul ins però betg desister cumplettamain da l'instrucziun da preschientscha. En las ultimas emnas possian ins anc ina giada emplenir las largias da savida.

Tar la scola professiunala a Cuira, GBC, pon ils magisters decider sez, sch'els vulan turnar en stanza da scola u cuntinuar cun il sistem da l'instrucziun a distanza. Planisà è che classas pli grondas restan vinavant a chasa. Classas cun radund 15 scolars percunter duessan returnar en chasa da scola. In'excepziun datti tar las classas da maturitad professiunala. Tar quellas classas èsi cler che tuts restan a chasa fin la fin da l'onn.

Il Lyceum Alpinum a Zuoz avra las portas per tut quels che vulan. Quai vul dir che las lecziuns vegnan ad avair lieu tut normal cun magister en stanza da scola. Vitiers datti però er l'instrucziun digitala, perquai che blers scolars vivan en l'exteriur e n'han betg la pussaivladad da vegnir en Svizra. Uschia vegnan las lecziuns era registradas per che scolars en autras zonas d'urari na ston betg far scola da notg. Ils scolars n'èn betg sfurzads dad ir puspè a scola. Quels ch'han in nausch sentiment pon er restar a chasa e far instrucziun a distanza. Quels scolars che van però puspè a scola, quels han da far il test da corona per esser segirs ch'els n'èn betg s'infectads.

RTR actualitad 08:00

Artitgels legids il pli savens

Scrollar a sanestra Scrollar a dretga