Siglir tar il cuntegn

Header

cuntegn

Teater e corona Il coronavirus metta er sin chau la vita dals teatrists

Roman Weishaupt surpiglia l'avust 2020 la direcziun dal teater a Cuira. Il coronavirus influenzescha gia uss la nova stagiun da teater – e quai betg be en la planisaziun.

Sche Roman Weishaupt avess da crear in da teater davart il coronavirus numnass el quel: «L'amur en il temp da corona», in toc davart l'interacziun umana en la societad durant la crisa. Temp da scriver quest toc n'ha il teatrist dentant betg. A partir da l'avust 2020 è el responsabel per il program dal teater da Cuira.

Gia uss è sia lavur per la proxima stagiun da teater autra.

Ina gronda part da mia lavur è, d'ir a guardar autras producziuns. Quella lavur croda uss davent.
Autur: Roman Weishaupt Teaterist

Ina dumonda che fatschenta el ed il team dal teater: Tge program vul la glieud vesair suenter la crisa da corona? Era co acturas ed acturs vegnan a pudair lavurar en futur n'è betg enconuschent.

audio
Roman Weishaupt davart il teater grischun durant il temp da crisa
ord Actualitad dals 07.04.2020.
laschar ir. Durada: 4 minutas 12 Secundas.

In'ulteriura sfida è la planisaziun: Per part stoppian acturas ed acturs dir giu ina preschentaziun, perquai ch'autras producziuns da las acturas ed acturs sa spostian. Per quella data stoppia el tschertgar in'alternativa. Ins stoppia esser flexibel. Intginas represchentaziuns en il teater vegnan dentant er spustadas da la stagiun actuala sin proxim atun.

Quai capita d'ina vart ord motivs da solidaritad cun acturs, da l'autra vart pervia da contracts. I dat contracts che lian il teater vid ina tscherta obligaziun da preschentar.
Autur: Roman Weishaupt Teaterist

Situaziun dad acturas ed acturs

Roman Weishaupt è er ferm en contact cun acturas ed acturs. Ils blers da quels lavuran sco acturs libers. La situaziun actuala saja per quels «fatala». Els na survegnian naginas pussaivladads da giugar en tocs da teater u films. Intginas acturas u acturs stoppian er sa tschentar la dumonda, co els survivian finanzialmain quest onn.

Il sustegn che la Confederaziun porscha, saja perquai fitg impurtant. Quella haja baud schon resguardà la cultura. En auters pajais, per exempel en Germania, saja quai auter. Là na vegnia la cultura anc betg resguardada adequatamain.

Boom da teater en futur?

Il program da la proxima stagiun preschenta il teater a Cuira en il decurs dals proxims mais. Roman Weishaupt spera dentant gia uss cun blers sezs plains, cura che la crisa actuala è passada. L'istorgia haja mussà, che suenter ina crisa haja la glieud in pli grond basegn da sa divertir, da vesair las varts bellas da la vita. «Jau suppon che quest qua pudess avair in effect sumegliant».

RTR actualitad 07:00

Artitgels legids il pli savens