Project da generaziuns
La citad da Cuira less investir en ina nova chasa da scola ed implant da sport. L’investiziun dad 88,8 milliuns francs prevesa ina chasa da scola primara ed ina per la scola secundara, inclusiv las classas da talent. Plinavant duai dar ina halla da gimnastica tripla cun ina tribuna per 1'600 aspectaturs ed in'aula cun 300 plazs. Sche tut va tenor plan, duai il project esser a fin l’avust 2024.
Quella investiziun saja tenor il parlament da Cuira necessaria perquai ch’il dumber d’uffants s’augmenta e perquai ch’ils implants da la scola da la citad sajan vegnids vegls. Ils areals da las chasas da scola Daleu e Florentini duain dentant vegnir nizzegiads en in'autra moda e maniera. La Scola professiunala a Cuira duai uschia survegnir dapli spazi che saja urgentamain necessari. Uschia restia la scola Daleu ina scola. Auter guardia or cun l'areal dal Florentini. Entras ina reutilisaziun e valurisaziun possian ins per part refinanziar las investiziuns en la nova chasa da scola.
Senza augmentar la taglia
L’entira investiziuns saja pussibla senza augmentar la taglia, di la cussegliera da la citad da Cuira, Sandra Maissen. En il mument saja Cuira en ina buna situaziun finanziala e sappia prestar quella investiziun.
Il project è vegnì approvà il mars unanimamain dal cussegl communal da Cuira.
Ulteriurs plaz da ballape
Ils plaz da ballape ch’èn fin uss là, vegnissan lura tar l’Obere Au. Là hai gia plirs plaz da ballape natirals sco er artifizials. Sch’il project vegn approvà, lura dessi tschintg novs plazs da ballape natirals ed ina tribuna tar l’Obere Au.
Cumprar l’areal da la Stadthalle
Il segund project ch’il suveran da Cuira ha da votar è davart cumprar l’areal da la Stadthalle e la Stadthalle sezza, per 7,6 milliuns francs.
Questa cumpra munta in pass enavant en la renovaziun da las pendicularas da Brambrüesch, ch'il suveran aveva gia concedì il matg 2019. Vinavant haja la citad uschia la controlla sur dal plaz e la segirtad da bajegiar, èn ils arguments dal cussegl communal.
Nova Stadthalle
La Stadthalle SA, a quella che la Stadthalle ed il plaz s'auda enfin uss, duai pudair bajegiar cun quels daners ina nova halla tar l’Obere Au. Tenor il president dal cussegl da la citad da Cuira, Mario Cortesi, èsi uschè u uschia nairas uras da renovar la Stadthalle. Il project da bajegiar ina nova halla sto dentant l'emprim vegnir approvà da la populaziun tar ina proxima votaziun.
En cas d'in Na
En cas ch’il suveran da Cuira schess Na a la cumpra da l'areal, lura stuess la Stadthalle Cuira SA chattar ina persuna privata che cumprass la parcella. Cun quai che l’areal tutga lura ad ina terza persuna, n’avess la citad da Cuira nagina influenza tge che vegniss bajegià sin quella parcella, scriva il cussegl communal. Ed uschia n'era betg, sch'insumma, nua che la nova staziun da val vegniss bajegiada sin l'areal.
Il cussegl communal ha approvà unanimamain l’investiziun il mars.